Президент қарори билан Фаррух Рустамов Рақамли технологиялар вазирлиги ҳузуридаги Ахборотлаштириш ва телекоммуникациялар соҳасида назорат инспекцияси бошлиғи лавозимига тайинланди. Бу ҳақда вазирлик матбуот хизмати хабар берди.
Фаррух Рустамов 2024 йил январидан буён “Ўзбектелеком” АК Uzmobile мобил оператори филиали директори лавозимида ишлаб келаётганди.
2022 йилнинг апрель ойида Аъзам Абдуллаев Ахборотлаштириш ва телекоммуникация соҳасида назорат бўйича давлат инспекциясининг бошлиғи вазифасини бажарувчи этиб тайинланганди.
Эслатиб ўтамиз, 2021 йилнинг 3 ноябрь куни Ахборотлаштириш ва телекоммуникациялар соҳасида назорат бўйича давлат инспекцияси (“Ўзкомназорат”) Telegram, YouTube, Instagram, Facebook, “Одноклассники”нинг Ўзбекистондаги фаолиятини чеклагани ҳақида хабар берилганди.
Шундан сўнг, Президент матбуот котиби Шерзод Асадов “Ўзкомназорат”нинг бир ёқлама, узоқни ўйламай қилган ҳаракатидан давлат раҳбари хабар топганини маълум қилди. Ахборотлаштириш ва телекоммуникациялар соҳасида назорат бўйича давлат инспекцияси бошлиғи Ғолибшер Зияев эса нотўғри ва келишилмаган хатти-ҳаракатлари учун эгаллаб турган вазифасидан четлатилди.
Изоҳ (0)