Toshkent–Fukuok yo‘nalishidagi 9S-1021 reysi 21-fevral kuni soat 23:55 da jo‘nashi rejalashtirilgan edi, biroq texnik sabablarga ko‘ra kechiktirildi. Bu haqda Air Samarkand xabar berdi.
Qayd etilishicha, uchishni boshlash vaqtida ekipaj shassi tebranishini sezib, xavfsizlik qoidalariga muvofiq, to‘g‘ri va professional qaror qabul qilib, parvozni to‘xtatdi. Samolyot terminalga qaytarilib, muhandislar tomonidan batafsil tekshiruvdan o‘tkazildi.
Tekshiruv natijasida muayyan detallarning almashtirilishi zarur ekani aniqlandi va hozirda ushbu ishlar amalga oshirilmoqda. Nosozlik bartaraf etilgach, samolyot qo‘shimcha tekshiruvdan o‘tkaziladi.
Aviatsiya qoidalariga muvofiq, yo‘lovchilar mehmonxonaga joylashtirildi. Taxminiy jo‘nash vaqti – 22-fevral, soat 22:00 (mahalliy vaqt).
Fukuok bu Vyetnamning janubidagi g‘arbiy qismida joylashgan orol va tuman. Fukuok oroli Vyetnamning eng katta orolidir va mamlakatning eng muhim turistik markazlaridan biri hisoblanadi.
Bundan avval 2025-yil 28-yanvar kuni Uzbekistan Airwaysʼning HY101 reysi (Toshkent—Nyu York) Islandiyaning Keflavik shahridagi zaxira aerodromiga majburiy qo‘nishni amalga oshirgan edi. Maʼlum qilinishicha, bunga parvoz davomida yo‘lovchilardan birida tug‘uruq boshlangani sabab bo‘lgan. Yo‘lovchi o‘g‘il farzandini dunyoga keltirgan. Samolyot muvaffaqiyatli qo‘nganidan so‘ng, tibbiyot xodimlari bortga ko‘tarilib, zarur yordam ko‘rsatgan. Ona va chaqaloq mahalliy klinikaga yetkazilgan.
Uzbekistan Airways matbuot xizmati kompaniya samolyotida 15-yanvar kuni nosozlik kuzatilganini maʼlum qilgandi. Qayd etilishicha, Vnukovo xalqaro aeroportida havo kemasida texnik nosozlik vujudga kelgan. Shu sababli Uzbekistan Airways aviakompaniyasining bir nechta aviaqatnovlari majburiy kechiktirilgan. Bortida 132 yo‘lovchi bo‘lgan samolyot aeroportga qo‘nayotganda dvigatellardan biri ishdan chiqqan. Qo‘nish muvaffaqiyatli amalga oshirilgan.
Shuningdek, 1-fevral kuni Centrum Air aviakompaniyasining C63336 raqamli reysida Madinadan Farg‘onaga uchayotgan A321neo samolyoti Marida (Turkmaniston) majburiy qo‘nishni amalga oshirgan. 21-fevral kuni Toshkentdan Jiddaga uchayotgan samolyot favqulodda Bahraynga qo‘ngan.
Izoh (0)