Испания суди мамлакат Футбол федерациясининг (RFEF) собиқ раҳбари Луис Рубиалесга футболчи Женнифер Эрмосони унинг розилигисиз ўпганлиги учун 10,8 минг евро миқдорида жарима белгилади. Бу ҳақда Марказий жиноий суднинг қарорига таяниб, РИА Новости хабар бермоқда.
Суд қарорига кўра, Рубиалес “ўпиш орқали жинсий зўравонлик” учун бир ярим йил давомида кунига 20 евродан жарима тўлайди. Шунингдек, у бир йил давомида футболчидан 200 метр узоқликда юриши керак. Рубиалес ушбу ҳукм устидан судга шикоят қилиши мумкин.
The Guardian нашрининг қайд этишича, Рубиалес қамоқ жазосидан қутулиб қолган. Суд мажлисида у ўз ҳаракатлари Эрмосонинг розилиги билан амалга ошганини таъкидлаб, қуйидагича баёнот берди:
Мен мутлақо ишонч билан айта оламанки, у менга рухсат берган эди. Энди эса хато қилганим аён бўлди. Бу ўз-ўзидан содир бўлди. Мен ўзимни жамоа аъзосидек тутдим. Мен совуққонроқ бўлишим ва вазиятга расмийроқ ёндашишим керак эди.
Нашрнинг ёзишича, суд шунингдек, айблов эълон қилинган собиқ аёллар терма жамоаси бош мураббийи Хорхе Вилда, Испания Футбол федерациясининг спорт директори Алберт Луке ва федерациянинг маркетинг бўлими раҳбари Рубен Riveraни оқлаган. Аввалроқ тергов улар Женнифер Эрмосога босим ўтказиб, ўпиш “ўзаро келишув” асосида бўлганини тан олишга мажбурламоқчи бўлган деб ҳисоблаганди.
Рубиалес эса футболчига босим ўтказмаганини ва уни ўпишга розилик берганини оммавий равишда эълон қилишга мажбурламаганини таъкидлади. У фақатгина воқеа бўйича биргаликда баёнот беришга кўндирганини айтди. Эрмосо буни рад этган, аммо футбол федерацияси унинг номидан рухсатсиз шундай баёнот эълон қилган.
Маълумот учун, 2023 йилги жаҳон чемпионати финалида испаниялик футболчи қизлар инглизларни 1:0 ҳисобида мағлубиятга учратганидан кейин тақдирлаш маросими бўлиб ўтган. Шу пайтда Рубиалес миллий жамоанинг ғалабасидан хурсанд бўлиб, Эрмосони қучоқлаб, ўпиб олганди.
Изоҳ (0)