Ispaniya sudi mamlakat Futbol federatsiyasining (RFEF) sobiq rahbari Luis Rubialesga futbolchi Jennifer Ermosoni uning roziligisiz o‘pganligi uchun 10,8 ming yevro miqdorida jarima belgiladi. Bu haqda Markaziy jinoiy sudning qaroriga tayanib, RIA Novosti xabar bermoqda.
Sud qaroriga ko‘ra, Rubiales “o‘pish orqali jinsiy zo‘ravonlik” uchun bir yarim yil davomida kuniga 20 yevrodan jarima to‘laydi. Shuningdek, u bir yil davomida futbolchidan 200 metr uzoqlikda yurishi kerak. Rubiales ushbu hukm ustidan sudga shikoyat qilishi mumkin.
The Guardian nashrining qayd etishicha, Rubiales qamoq jazosidan qutulib qolgan. Sud majlisida u o‘z harakatlari Ermosoning roziligi bilan amalga oshganini ta’kidlab, quyidagicha bayonot berdi:
Men mutlaqo ishonch bilan ayta olamanki, u menga ruxsat bergan edi. Endi esa xato qilganim ayon bo‘ldi. Bu o‘z-o‘zidan sodir bo‘ldi. Men o‘zimni jamoa a’zosidek tutdim. Men sovuqqonroq bo‘lishim va vaziyatga rasmiyroq yondashishim kerak edi.
Nashrning yozishicha, sud shuningdek, ayblov e’lon qilingan sobiq ayollar terma jamoasi bosh murabbiyi Xorxe Vilda, Ispaniya Futbol federatsiyasining sport direktori Albert Luke va federatsiyaning marketing bo‘limi rahbari Ruben Riverani oqlagan. Avvalroq tergov ular Jennifer Ermosoga bosim o‘tkazib, o‘pish “o‘zaro kelishuv” asosida bo‘lganini tan olishga majburlamoqchi bo‘lgan deb hisoblagandi.
Rubiales esa futbolchiga bosim o‘tkazmaganini va uni o‘pishga rozilik berganini ommaviy ravishda e’lon qilishga majburlamaganini ta’kidladi. U faqatgina voqea bo‘yicha birgalikda bayonot berishga ko‘ndirganini aytdi. Ermoso buni rad etgan, ammo futbol federatsiyasi uning nomidan ruxsatsiz shunday bayonot e’lon qilgan.
Ma’lumot uchun, 2023-yilgi jahon chempionati finalida ispaniyalik futbolchi qizlar inglizlarni 1:0 hisobida mag‘lubiyatga uchratganidan keyin taqdirlash marosimi bo‘lib o‘tgan. Shu paytda Rubiales milliy jamoaning g‘alabasidan xursand bo‘lib, Ermosoni quchoqlab, o‘pib olgandi.
Izoh (0)