Лионель Месси футбол тарихидаги энг кўп соврин олган футболчига айланди

Лионель Месси футбол тарихидаги энг кўп мукофот олган футболчига айланди.

Бугун, 15 июль куни Аргентина терма жамоаси финалда Колумбия терма жамоасини мағлуб этди ва Америка Кубоги-2024 ғолибига айланди.

Шу тариқа, Лионель Месси футбол тарихидаги энг кўп соврин ютган футболчига айланди. 37 ёшли ҳужумчи ҳисобида 45 та соврин бор.

Ҳимоячи Дани Алвес 44 унвон билан иккинчи ўринни эгаллаб турибди. Учинчи ўринни эса бутун фаолияти давомида “Ал-Аҳли”да ўйнаган мисрлик ярим ҳимоячи Хосам Ашҳур якунлади – 39 та соврин.

2024 йилги Америка Кубогида Месси тўртта ўйин ўтказиб, битта гол урди ва битта голли узатмани амалга оширди.

Месси “Барселона” таркибида 10 марта Ла Лига ғолиби бўлган, 4 марта Чемпионлар Лигасида ғолиб чиққан, 8 марта Испания Суперкубогини, 7 марта мамлакат кубогини қўлга киритган, шунингдек, уч марта Клублар ўртасидаги жаҳон чемпионати ва Европа Суперкубогини қўлга киритган.

“ПСЖ” таркибида у 2 марта Франция чемпионлиги ва бир марта мамлакат Суперкубогида зафар қучган.

Аргентина терма жамоаси билан Лео Жаҳон кубоги, Америка кубоги, Олимпиада ғолиблиги, ёшлар ўртасидаги Жаҳон чемпионати, шунингдек “Финалиссимо” ғолиблигини қўлга киритди.

2023 йилнинг июлидан бери Месси “Интер Майами”да ўйнамоқда. Transfermarkt 37 ёшли футболчини 30 миллион еврога баҳоламоқда.