Тошкент вилоятининг Чирчиқ туманида йўловчиларни ташишга мўлжалланган поезд бир фуқарони уриб юборди, деб хабар беради Транспорт ва туризм объектларида хавфсизликни таъминлаш департаменти.
Маълум қилинишича, 16 февраль куни Чирчиқ трансформатор заводида мазкур корхонанинг ишчи хизматчиси бўлган Ш.К.ни Чирчиқ тумани Чирчиқ—Аранчи темир бекати 38-километрида Тошкент—Хожикент йўналишидаги шаҳарлараро қатновчи йўловчи поезди уриб юборган. Кўнгилсиз ҳодиса оқибатида жабрланувчи воқеа жойида вафот этган.
Марҳум ишлаган корхонада бахтсиз ҳодиса муҳокамаси бўлиб ўтган. «Йиғилишга таклиф этилганлар томонидан ишчи-хизматчиларга темир йўлни белгиланмаган жойидан кесиб ўтмаслик, қулоқчинлардан фойдаланмаслик, темир йўл ҳудуди ўта хавфли ҳудуд экани тўғрисида тушунчалар бериб ўтилди», — дейилади хабарда.
Аввалроқ Тошкент вилоятида наушник тақиб, темир йўл бўйлаб ҳаракатланган фуқарони поезд уриб кетгани, Тошкент вилоятида «электричка» темир йўл рельслари орасида ётган маст эркакни туртиб юборгани, Хоразмда темир йўл рельси ёнида ухлаб қолган маст фуқаро сабаб Хива—Тошкент поезди 16 дақиқа тўхтаб қолгани, Самарқандда юк поезди қулоқчин таққан йигитни уриб кетмаслик учун фавқулодда тўхташни амалга оширгани, Самарқанд вилоятида поезд уриб кетиши оқибатида уч киши, жумладан, 8-синф ўқувчиси ҳалок бўлгани тўғрисида хабар берилганди.
Изоҳ (0)