Тошкент вилоятининг Ўрта Чирчиқ туманида 25 ёшли фуқаро поезд уриб кетиши оқибатида ҳалок бўлди. Бу ҳақда «Миллий» телеканалининг «Миллар» дастурида маълум қилинди.
Маълум қилинишича, 7 июнь куни ИИВ ТХТББга Термиз—Андижон йўналиши бўйича ҳаракатланаётган йўловчи поезди одам уриб юборгани тўғрисида хабар келиб тушган.
Гувоҳларнинг сўзларига кўра, марҳум эрталаб далага ишлашга кетаётган вақтида ўз ҳаётини хавф остига қўйиб, поезд йўлини кесиб ўтмоқчи бўлган. Аниқланишича, марҳумнинг туғма кўриш ва эшитиш қобилиятида нуқсони бўлгани сабаб поезд товушини эшитмай қолган.
Шунингдек, 7 июнь Тошкент вилояти Чирчиқ шаҳри «Мир Алишер» МФЙда ҳудудидан ўтувчи поезд йўлида ҳам бахтсиз ҳодиса содир бўлган. Эрталабки соат 09:30 ларда «электровоз» темир йўл кесишмасидан велосипедда ўтаётган 20 ёшли фуқарони уриб юборган. Оқибатда йигит 15-20 метр масофага учиб тушган ва воқеа жойида вафот этган.
Аниқланишича, марҳум бу вақтда қўл телефонидан фойдаланиб, темир йўл кесишмасидан ўтмоқчи бўлган.
Аввалроқ Жиззахда поезд темир йўлда қулоқчин тақиб кетаётган фуқаро сабаб фавқулодда тўхтагани, Тошкент—Хўжакент поезд йўлида ухлаб қолган маст фуқаронинг ҳаёти сақлаб қолингани тўғрисида хабар берилганди.
Изоҳ (0)