3 январь куни Тошкент вилояти Ўрта Чирчиқ туманидан ўтган поезд йўлида содир бўлган бахтсиз ҳодиса оқибатида бир киши ҳалок бўлди, деб хабар беради Транспорт ва туризм объектларида хавфсизликни таъминлаш департаменти.
Маълум қилинишича, туманнинг «Боёвул» МФЙда яшаган Н.А. темир йўл изи атрофида қулоғига наушник тақиб, чорва молларини боқиб юрган вақтида Тўйтепа—Озодлик йўналишидан келаётган юк поезди уриб юбориши оқибатида вафот этди.
Мазкур ҳолат юзасидан 6 январь куни ушбу маҳаллада бахтсиз ҳодиса муҳокамаси бўлиб ўтган. Йиғилишда фуқароларга темир йўл атрофларида наушниклардан фойдаланмаслик, йўловчи ва юк поездларининг хавфсиз ҳаракатланишини таминлаш мақсадида темир йўл изининг белгиланмаган жойларидан кесиб ўтмаслик бўйича тушунчалар берилган.
Аввалроқ Тошкент вилоятида «электричка» темир йўл рельслари орасида ётган маст эркакни туртиб юборгани, Хоразмда темир йўл рельси ёнида ухлаб қолган маст фуқаро сабаб Хива—Тошкент поезди 16 дақиқа тўхтаб қолгани, Самарқандда юк поезди қулоқчин таққан йигитни уриб кетмаслик учун фавқулодда тўхташни амалга оширгани, Самарқанд вилоятида поезд уриб кетиши оқибатида уч киши, жумладан, 8-синф ўқувчиси ҳалок бўлгани тўғрисида хабар берилганди.
Изоҳ (0)