Бухоро вилояти Когон туманида поезд Lacetti машинасини уриб юборгани ҳақида хабарлар тарқалди. Вилоят Ички ишлар бошқармаси мазкур хабар юзасидан маълумот берди.
Унга кўра, 13 апрель куни соат 15:15 ларда Бухоро вилояти Транспортда Хавфсизликни таъминлаш бошқармаси ҳамда вилоят ИИБ нинг 102 автоматлаштирилган тизимига ушбу ҳолат юзасидан хабар тушган. Аниқланишича, ҳолат шу куни соат 14:00 ларда Бухоро—Хўжадавлат йўналишининг 5975-километрида содир бўлган. ПЧ-10 корхонасига тегишли МПТ-930 мотовоз машинасини бошқариб келаётган Х.Й. исмли фуқаро Бухоро—Пойкент йўналиши бўйича ҳаракатланаётганда қўриқланмайдиган темирйўл кесишмасидан ўтаётган Навоий вилояти Қизилтепа туманида яшовчи А.А. исмли шахс бошқарувида бўлган Lacetti’ни ўнг томонидан уриб юбориши натижасида йўл-транспорт ҳодисаси содир бўлган.
Мазкур ҳодисада Lacetti ҳайдовчиси А.А. бош мияга қон қуйилиши, кўкрак қафаси жароҳати, ўнг ўпка ёрилиши ташхиси билан тиббий муассасада даволанмоқда. Ҳолат юзасидан терговга қадар текширув ҳаракатлари олиб борилмоқда.
Изоҳ (0)