Ўзбекистонда 2024 йилда 233,8 трлн сўмлик қурилиш ишлари бажарилган, деб хабар бермоқда Статистика агентлиги.
Қайд этилишича, бу кўрсаткич 2023 йилнинг мос даври билан солиштирилганда 8,8 фоизга ошган. 2025 йилнинг 1 январь ҳолатига Ўзбекистонда қурилиш фаолияти билан шуғулланаётган корхона ва ташкилотлар сони 27 408 тани ташкил этган.
Қурилиш ишлари ҳажми таркибида:
- кичик корхона ва микрофирмалар — 46,2 фоиз
- йирик қурилиш ташкилотлари — 23,5 фоиз
- норасмий сектор — 30,3 фоиз.
2024 йилнинг январь—август ойларида Ўзбекистонда кичик қурилиш корхона ва микрофирмалар томонидан 60,9 трлн сўмлик қурилиш ишлари бажарилган эди. Бу кўрсаткич 2023- йилнинг январь—август ойига нисбатан солиштирилганда 5,3 фоизга ўсган.
Кичик корхона ва микрофирмалар томонидан бажарилган қурилиш ишлари ҳажмининг барча турдаги корхона ва ташкилотлар томонидан бажарилган жами қурилиш ишлари ҳажмидаги улуши 55,8 фоизни ташкил этган.
Аввалроқ 2024 йилнинг январь—июль ойларида Ўзбекистонда қурилиш ишларининг иқтисодий фаолият турлари бўйича бино ва иншоотлар қурилиши улуши 68,7 фоизни, фуқаролик объектлари 21,1 фоизни ва ихтисослаштирилган қурилиш ишлари 10,2 фоизни ташкил этгани хабар берилганди.
Шунингдек, Қорақалпоғистонда қурилиш ишларининг иқтисодий фаолият турлари бўйича бино ва иншоотлар қурилиши улуши 72,1 фоизни, фуқаролик объектлари 22,4 фоизни ва ихтисослаштирилган қурилиш ишлари 5,5 фоизни ташкил этган.
Изоҳ (0)