Лихтенштейнда жойлашган халқаро миқёсда хизмат кўрсатувчи Bendura Bank AG вакили Анатолий Наторча ўтган ҳафтада Ўзбекистонга ташриф буюриб, ҳамкорлар билан учрашувлар ўтказди.
Вакил ушбу сафари давомида мамлакатнинг қанчалик тез суръатларда ривожланаётгани ва халқаро сармояларни жалб этаётганига эътибор қаратди.
“Иқтисодий ислоҳотлар, ташқи савдонинг ўсиши ва халқаро инвесторлар билан фаол ҳамкорлик Ўзбекистонни ҳам минтақавий, ҳам жаҳон миқёсида муҳим иштирокчига айлантирмоқда.
Қизиқ томони шундаки, Лихтенштейн ва Ўзбекистон ўзига хос географик хусусиятга эга — иккаласи ҳам қуруқликда жойлашган бўлиб, денгизга тўғридан-тўғри чиқиш имкониятига эга эмас. Бу эса товарлар ва одамлар халқаро портларга етиб бориш учун камида иккита чегарани кесиб ўтишини тақозо этади. Ушбу ўхшашлик минтақаларимиз ўртасидаги мустаҳкам молиявий ва логистика алоқаларининг нақадар муҳимлигини кўрсатади”, деб ёзади Наторча LinkedIn’даги саҳифасида.
У, шунингдек, Ўзбекистоннинг муваффақиятли тадбиркорлари ва инвесторлари билан ҳамкорликда амалга оширилиши мумкин бўлган катта имкониятлар мавжудлигини, уларга бойликни сақлаш ва активларни бошқариш бўйича ишончли ечимларни таклиф этишга тайёр эканини билдирди.
Bendura Bank AG — Лихтенштейнда жойлашган халқаро миқёсда хизмат кўрсатувчи банк бўлиб, у асосан хусусий банк хизматлари, инвестиция бошқаруви, ва молиявий маслаҳатлар бўйича ихтисослашган. Bendura Bank AG 1998 йилда ташкил этилган бўлиб, Лихтенштейннинг молиявий хизматлар саноатида ўз ўрнини топган йирик банклардан биридир.
Изоҳ (0)