Lixtenshteynda joylashgan xalqaro miqyosda xizmat ko‘rsatuvchi Bendura Bank AG vakili Anatoliy Natorcha o‘tgan haftada O‘zbekistonga tashrif buyurib, hamkorlar bilan uchrashuvlar o‘tkazdi.
Vakil ushbu safari davomida mamlakatning qanchalik tez sur’atlarda rivojlanayotgani va xalqaro sarmoyalarni jalb etayotganiga e’tibor qaratdi.
“Iqtisodiy islohotlar, tashqi savdoning o‘sishi va xalqaro investorlar bilan faol hamkorlik O‘zbekistonni ham mintaqaviy, ham jahon miqyosida muhim ishtirokchiga aylantirmoqda.
Qiziq tomoni shundaki, Lixtenshteyn va O‘zbekiston o‘ziga xos geografik xususiyatga ega — ikkalasi ham quruqlikda joylashgan bo‘lib, dengizga to‘g‘ridan-to‘g‘ri chiqish imkoniyatiga ega emas. Bu esa tovarlar va odamlar xalqaro portlarga yetib borish uchun kamida ikkita chegarani kesib o‘tishini taqozo etadi. Ushbu o‘xshashlik mintaqalarimiz o‘rtasidagi mustahkam moliyaviy va logistika aloqalarining naqadar muhimligini ko‘rsatadi”, deb yozadi Natorcha LinkedIn’dagi sahifasida.
U, shuningdek, O‘zbekistonning muvaffaqiyatli tadbirkorlari va investorlari bilan hamkorlikda amalga oshirilishi mumkin bo‘lgan katta imkoniyatlar mavjudligini, ularga boylikni saqlash va aktivlarni boshqarish bo‘yicha ishonchli yechimlarni taklif etishga tayyor ekanini bildirdi.
Bendura Bank AG — Lixtenshteynda joylashgan xalqaro miqyosda xizmat ko'rsatuvchi bank bo'lib, u asosan xususiy bank xizmatlari, investitsiya boshqaruvi, va moliyaviy maslahatlar bo‘yicha ixtisoslashgan. Bendura Bank AG 1998-yilda tashkil etilgan bo'lib, Lixtenshteynning moliyaviy xizmatlar sanoatida o'z o'rnini topgan yirik banklardan biridir.
Izoh (0)