Украина ўз ерини Россияга топшириш ниятида эмас. Бу ҳақда Украина раҳбари Владимир Зеленский ўзининг Telegram каналидаги мурожаатида маълум қилди.
“Украина ҳудудий масаласига жавоб аллақачон Украина конституциясида мавжуд. Бундан ҳеч ким чекинмайди ва чекинолмайди ҳам. Украиналиклар ўз ерларини босқинчига бермайди”, деди у.
Зеленский Украинанинг тинчликка олиб келадиган ҳақиқий ечимларга тайёр эканини таъкидлаган. Бироқ унинг айтишича, Украинага қарши ва Украинанинг иштирокисиз қабул қилинган ҳар қандай қарорлар тинчликка эришиш йўлида тўсиқ бўлади.
“Украина тинчлик келтириши мумкин бўлган ҳақиқий ечимларга тайёр. Бизга қарши ҳар қандай қарор, Украинасиз ҳар қандай қарор — бу бир вақтнинг ўзида тинчликка қарши қарордир. Улар ҳеч қандай натижа бермайди. Бу ўлик қарорлар, улар ҳеч қачон ишламайди. Бизга эса одамлар ҳурмат қиладиган ҳақиқий, жонли тинчлик керак. Биз президент Трамп билан, барча ҳамкорлар билан биргаликда ҳақиқий ва энг муҳими, узоқ муддатли тинчлик учун ишлашга тайёрмиз — Москванинг истаги туфайли бузилмайдиган тинчлик”, деди президент.
Шунингдек, у Путин ва Трампнинг Аляскадаги учрашуви “Украинадан жуда узоқда” бўлиб ўтишини таъкидлаган.
“Албатта, биз Россияга қилган иши учун мукофот бермаймиз... Украиналиклар ўз ерини босқинчига совға қилмайди”, деди Зеленский.
Бундан аввал АҚШ президенти Дональд Трамп Украина президенти Владимир Зеленский “бирор нарсани имзолашга” тайёр туриши кераклигини маълум қилганди.
Трамп ўзининг Truth Social ижтимоий тармоғидаги саҳифасида россиялик ҳамкасби Владимир Путин билан 15 август куни Аляскада учрашишни режалаштирганини маълум қилди. Президентлар можарони узоқ муддатли ҳал этиш вариантларини муҳокама қиладилар.
Изоҳ (0)