Президент Шавкат Мирзиёев 2 январь куни инвестиция сиёсатини амалга ошириш ва энергетика тизимида қайта тикланувчи энергия қувватлари улушини кўпайтириш бўйича 2023 йилда қилинган ишлар ва 2024 йилга мўлжалланган режалар тақдимоти билан танишди. Бу ҳақда Президент матбуот хизмати хабар берди.
Маълум қилинишича, 2023 йил якуни билан жами 22 миллиард доллардан зиёд хорижий инвестициялар ўзлаштирилган, бу аввалги йилга нисбатан 1,8 баробар кўп. Жорий йилда хорижий инвестициялар ҳажмини янада кўпайтириш зарурлиги қайд этилди. Бунда асосий эътиборни қуйидаги тармоқларга қаратиш топширилди:
- электротехника;
- машинасозлик;
- қурилиш материаллари;
- фармацевтика;
- тўқимачилик;
- чарм.
Йирик инвесторлар билан манзилли ишлаш, инвестицияларни жалб қилишда иқтисодий дипломатия ва чет элдаги дипломатик ваколатхоналар иштирокини кучайтириш алоҳида таъкидланди. Янги инвестиция лойиҳаларни амалга оширишда ҳудудлардаги махсус зоналардан ва саноат кооперацияси имкониятларидан кенг фойдаланиш орқали қўшилган қиймат занжирини яратиш зарурлиги айтилди.
Тармоқ ва ҳудудлар раҳбарлари инвестиция масалаларини ҳал этишда саноат тармоқлари билан яқиндан ишлаши, асосий эътиборни ҳудудларда иқтисодиётни диверсификация қилиш, янги иш ўринларни кўпайтиришга қаратиши қайд этилди.
Шунингдек, 2024 йилда грант маблағларини жалб қилишни фаоллаштириб, экология, атроф-муҳитни муҳофаза қилиш, соғлиқни сақлаш, олий таълим, фан ва инновация соҳаларида хорижий ва халқаро ташкилотлар билан ҳамкорликни кенгайтириш вазифалари белгиланди.
Йиғилишда “яшил” энергетикани ривожлантириш масалалари ҳам кўриб чиқилди.
Бугунги кунда Ўзбекистонда қуёш, шамол ва гибрид турдаги электр станцияларни давлат-хусусий шериклик асосида барпо этиш бўйича умумий қуввати 6,3 гигаватт бўлган 28 та лойиҳа доирасида иш олиб борилмоқда. Шундан 2023 йилда хорижий инвесторлар билан биргаликда умумий қуввати 2,6 гигаваттлик 7 та лойиҳа доирасида дастлабки қувватлар ишга туширилган.
Ўтган йил 27 декабрь куни президент иштирокида ўтган маросимда Самарқанд, Жиззах, Сурхондарё, Бухоро ва Қашқадарё вилоятларида бешта қуёш фотоэлектр станцияси, Навоий вилоятида шамол электр станцияси қувватлари тармоққа уланди.
Йиғилишда ўтган йилда бошланган лойиҳаларни 2024 йилда тўлиқ якунига етказиш вазифалари, келгуси йилларда “яшил” энергия ишлаб чиқариш бўйича янги қувватларни яратиш режалари муҳокама қилинди.
2024 йилда қуёш электр станцияларининг умумий қувватини 2,6 гигаваттга, шамол электр станциялари қувватини 900 мегаваттга етказиш ва 400 мегаваттлик энергия сақлаш қурилмаларини ишга тушириш режалаштирилган.
Президент электр энергетика тизимининг барқарор ишлашини таъминлаш учун ўзгарувчан ишлаб чиқариш қувватлари қўшилишини инобатга олган ҳолда тармоқларни ривожлантириш концепциясини ишлаб чиқиш вазифасини қўйди. Бунда мавжуд тармоқларни модернизация қилиш, янги подстанциялар, узатиш тармоқларини қуриш, замонавий автоматлаштирилган ҳимоя тизимларини, рақамлаштирилган бошқарув тизимларини (SCADA/ЭМС) жорий этиш, захира қувватлари ва энергия сақловчи тизимларнинг тармоқдаги улушини кўпайтириш чора-тадбирларини белгилаш зарурлиги таъкидланди.
Йиғилишда энергетика тизимига тўғридан тўғри хорижий инвестицияларни кўпайтириш масаласига тўхталиб ўтилди.
Энергетика тармоғига инвестиция киритаётган асосий хорижий ҳамкорлар билан манзилли ишлаш ва инвестициявий шерикликни янада кенгайтириш мақсадида Энергетика вазирлигининг бу борадаги фаолиятини такомиллаштириш топширилди.
Халқаро тажриба асосида қишлоқ хўжалиги ерларида маҳсулот етиштирувчилар томонидан ўз эҳтиёжлари учун қуёш панелларини ўрнатиш ва электр энергиясини ишлаб чиқариш – агроволтаика амалиётини жорий этиш имкониятини ўрганиш ва бу йўналишни қўллаб-қувватлаш бўйича таклифлар киритишга кўрсатма берилди.
Изоҳ (0)