Тошкент инвестиция форуми якуни бўйича 7,8 млрд долларлик аниқ шартномалар ва инвестиция битимлар пакети имзоланди

Тошкент халқаро инвестиция форуми (ТХИФ) ўз ишини якунлади. Тадбир 2 мингдан ортиқ иштирокчиларни – жаҳоннинг 56 мамлакатидан йирик инвесторлар ва юқори мартабали меҳмонларни бирлаштирган бизнес дунёсидаги муҳим воқеага айланди, деб хабар беради Инвестициялар ва ташқи савдо вазирлиги матбуот хизмати.

Таъкидланишича, форум орқали мамлакат ҳукумати халқаро ишбилармонлар ҳамжамиятига инвесторлар учун энг қулай ва жозибали шароитларни яратиш ҳамда хорижий ҳамкорлар ва халқаро ташкилотлар билан ўзаро манфаатли муносабатларни ҳар томонлама чуқурлаштиришга қаратилган саъй-ҳаракатларнинг йўналишларини белгилаб берган.

Форумнинг панел мунозаралари ва тадбирлари доирасида мамлакатнинг турли тармоқлари ва ҳудудларининг инвестициявий ва иқтисодий имкониятлари очиб берилган, Ўзбекистонни ижтимоий-иқтисодий ислоҳ қилиш борасида эришилган натижалар кўриб чиқилган. Шунингдек, Ўзбекистонни янада ривожлантиришнинг устувор йўналишлари, минтақавий ва жаҳон савдо алоқаларини ривожлантириш истиқболлари, инвестицияларни жалб қилиш механизмлари, савдони либераллаштириш ва миллий иқтисодиётнинг рақобатбардошлигини ошириш масалалари атрофлича кўриб чиқилган.

«Ҳукумат, ишбилармон ва эксперт доиралари вакиллари ковиддан кейинги даврда иқтисодий фаолиятни жадал ривожлантиришни тиклаш ва рағбатлантириш, камбағалликни қисқартириш, пул-кредит сиёсатини тартибга солиш, бизнесни қўллаб-қувватлаш, банк сектори ва молия бозорини ривожлантириш механизмларини муҳокама қилдилар», — дейилади хабарда.

Форум доирасида савдо, иқтисод, инвестициялар, техника, маданият, спорт ва ёшлар масалалари бўйича Ўзбекистон ва Саудия Арабистони ўртасидаги ҳукуматлараро комиссиясининг 5-йиғилиши, «Саноат кооперацияси. Янги имкониятлар» Ўзбекистон—Хитой инвестициявий форуми, шунингдек, халқаро молия институтлари, хорижий ҳукумат молиявий ташкилотлари раҳбарлари ва ривожланиш бўйича ҳамкорлар иштирок этган Ўзбекистон учун «мамлакат платформаси» бўлиб ўтди. Форум иштирокчилари икки томонлама учрашув ва музокаралар чоғида ҳам фаол фикр алмашган ва ҳамкорлик истиқболларини муҳокама қилган.

«ТХИФ ўзини минтақалараро ва халқаро алоқаларни мустаҳкамлаш ва ривожлантириш учун кенг кўламли мулоқот платформаси сифатида намойиш этиб, мамлакатлараро ва минтақалараро инвестициявий ва ташқи иқтисодий ҳамкорликнинг кучли катализаторига айланди. Ушбу форум Ўзбекистон ва бутун Марказий Осиё минтақаси иқтисодиётига хорижий инвестициялар ва замонавий технологияларни жалб қилиш, шунингдек, минтақа тадбиркорлари ва хорижий ишбилармон доиралар ўртасида тўғридан-тўғри алоқаларни ўрнатиш мақсадида уларни қизиқтирган йўналишларни кашф этиш учун доимий майдончага айланиши кутилмоқда», — дейилади хабарда.

Тошкент шаҳрида 24—26 март кунлари Тошкент халқаро инвестиция форуми ўтказилди. Ўзбекистонда илк марта бўлиб ўтган тадбирда халқаро молия ташкилотлари, вазирлик ва идоралар, дунёнинг етакчи компаниялари вакиллари, инвестор ва тадбиркорлар қатнашди. Форумнинг очилишида президент Шавкат Мирзиёев нутқ сўзлаб, тадбирдан кўзланган мақсад республикада инвестицион муҳитни яхшилаш эканини таъкидлади.