Ижтимоий тармоқларда қизнинг пойтахт аҳолисини ҳақоратлагани акс этган бир нечта видеолари тарқалиб, муҳокамаларга сабаб бўлганди. Тошкентнинг Юнусобод туманидаги “Анорзор” маҳалла фуқаролар йиғини биносида видеотасвирдаги қизга нисбатан очиқ суд мажлиси бўлиб ўтди. Бу ҳақда Олий суд порталида суд ҳужжати келтирилган.
Унга кўра, судланувчи 25 ёшли Н.Х. бўлиб, 5 февраль куни ўзининг Instagram саҳифасида Тошкент шаҳри аҳолисини ҳақорат қилиб 3−4 та видео жойлаган. Қиз судда видеони такси ҳайдовчиси уни қаердан келгани ҳақидаги саволидан сўнг жаҳли чиқиб тасвирга туширганини айтди.
Қизнинг сўзларига кўра, у видеоларни 5 дақиқадан кейин ўчириб юборган. Соғлиғи туфайли 4 маротаба наркоз олгани, шунинг учун тезда жаҳли чиқиб тинчлана олмаслигини ҳам айтган.
Суд Н.Х.ни Маъмурий жавобгарлик тўғрисидаги кодекснинг 183-моддаси (майда безорилик) билан айбдор деб топиб, унга нисбатан 10 суткага маъмурий қамоқ жазоси тайинлаган. Тайинланган жазо 10 февралдан бошлаб ҳисобланади.
“Бошқа қатарилмайди бундай ҳолат. Кечирим сўрайман халқдан. Мен учун катта дарс бўлди”, деган қиз.
2024 йилнинг июнь ойида 21 ёшли қиз вилоятликларни тилга олиб бўлмас сўзлар билан ҳақорат қилиб, шу қилмиши учун 15 суткага қамалганди. Ўша йилнинг июль ойи ўртасида Instagram’даги жонли эфирда “қишлоқилар одаммас” дея ҳақоратлаган қиз жаримага тортилган эди. Instagram’да салбий фикр билдирган кузатувчиларга жавоб тариқасида беҳаё сўзлар билан вилоятликларни ҳақорат қилган қиз 10 суткага қамалганди.
Изоҳ (0)