Тошкентда аёлни ҳақорат қилиб, унга пакет улоқтирган АҚШ фуқароси жарима тўлади

Тошкентда АҚШ фуқароси ҳимоя ордерини бузгани ва безорилик қилгани учун жарима тўлади. Бу ҳақда “Nemolchi.uz” хабар берди.

Маълум қилинишича, 1962 йилда туғилган М.П. исмли АҚШ фуқароси савдо марказида бирга яшайдиган аёл билан жанжаллашиб, уни ҳақорат қилган ва унга пакетлар улоқтирган. Бу аёлга нисбатан биринчи агрессив ҳолат эмас: жабрланувчи аввал ҳам ҳимоя ордерини олган.

9 июнь куни Жиноят ишлари бўйича Шайхонтоҳур туман суди видеоконференсалоқа орқали очиқ суд мажлисида АҚШ фуқаросини ҳимоя ордери талабларини бузиш (Ўзбекистон Республикаси Маъмурий жавобгарлик кодекси 206-1-модда) ва майда безорилик (183-модда) да айбдор деб топди.

Судья айбланувчининг ёши, оилавий аҳволи, шунингдек, моддий аҳволини инобатга олиб, унга нисбатан жарима тайинлашни белгилади:

• Маъмурий жавобгарлик тўғрисидаги кодекснинг 183-моддаси (майда безорилик) билан 990 минг сўм;
• Маъмурий жавобгарлик тўғрисидаги кодекснинг 206-1-моддасига (Тазйиқ ўтказган ва (ёки) зўравонлик содир этган ёхуд уларни содир этишга мойил бўлган шахс томонидан ҳимоя ордери талабларини бажармаслик) асосан 330 минг сўм.

Суд томонидан Маъмурий жавобгарлик тўғрисидаги кодекснинг 34-моддаси (бир нечта ҳуқуқбузарликларни содир этганлик учун маъмурий жазо қўллаш) билан айбланувчига иккита ҳуқуқбузарлик учун жами 990 000 сўм миқдорида жарима солинган.