Ijtimoiy tarmoqlarda qizning poytaxt aholisini haqoratlagani aks etgan bir nechta videolari tarqalib, muhokamalarga sabab bo‘lgandi. Toshkentning Yunusobod tumanidagi “Anorzor” mahalla fuqarolar yig‘ini binosida videotasvirdagi qizga nisbatan ochiq sud majlisi bo‘lib o‘tdi. Bu haqda Oliy sud portalida sud hujjati keltirilgan.
Unga ko‘ra, sudlanuvchi 25 yoshli N.X. bo‘lib, 5-fevral kuni o‘zining Instagram sahifasida Toshkent shahri aholisini haqorat qilib 3−4 ta video joylagan. Qiz sudda videoni taksi haydovchisi uni qayerdan kelgani haqidagi savolidan so‘ng jahli chiqib tasvirga tushirganini aytdi.
Qizning so‘zlariga ko‘ra, u videolarni 5 daqiqadan keyin o‘chirib yuborgan. Sog‘lig‘i tufayli 4 marotaba narkoz olgani, shuning uchun tezda jahli chiqib tinchlana olmasligini ham aytgan.
Sud N.X.ni Ma’muriy javobgarlik to‘g‘risidagi kodeksning 183-moddasi (mayda bezorilik) bilan aybdor deb topib, unga nisbatan 10 sutkaga ma’muriy qamoq jazosi tayinlagan. Tayinlangan jazo 10-fevraldan boshlab hisoblanadi.
“Boshqa qatarilmaydi bunday holat. Kechirim so‘rayman xalqdan. Men uchun katta dars bo‘ldi”, degan qiz.
2024-yilning iyun oyida 21 yoshli qiz viloyatliklarni tilga olib bo‘lmas so‘zlar bilan haqorat qilib, shu qilmishi uchun 15 sutkaga qamalgandi. O‘sha yilning iyul oyi o‘rtasida Instagramʼdagi jonli efirda “qishloqilar odammas” deya haqoratlagan qiz jarimaga tortilgan edi. Instagram’da salbiy fikr bildirgan kuzatuvchilarga javob tariqasida behayo so‘zlar bilan viloyatliklarni haqorat qilgan qiz 10 sutkaga qamalgandi.
Izoh (0)