Instagram'da salbiy fikr bildirgan kuzatuvchilariga javob tariqasida behayo so‘zlar bilan viloyatliklarni haqorat qilgan qiz 10 sutkaga qamaldi. Bu haqda Oliy sud matbuot xizmati “Daryo”ga xabar berdi.
Maʼlum qilinishicha, 2004-yilda tug‘ilgan, Toshkent viloyatining Chirchiq shahrida yashovchi S.R. 2024-yilning 20-iyul kuni Instagram sahifasida obunachilari bilan jonli muloqot qilayotgan vaqtida viloyatliklarni haqorat qilgan.
Qiz o‘ziga yozilgan izohlarga javoban behayo, uyatsiz so‘zlar bilan viloyatlarda yashovchilarning shaʼni va qadr-qimmatini qasddan kamsitgan. Uning mazkur harakatlari ijtimoiy tarmoq kuzatuvchilarining jiddiy noroziligiga sabab bo‘lgan.
Bundan tashqari, S.R. holat yuzasidan tergovga qadar tekshiruv o‘tkazish uchun Chirchiq shahar IIB XPG profilaktika inspektori kelganida ko‘chada baqir-chaqir qilib, jamoat tartibini va fuqarolar osoyishtaligini buzgan holda mayda bezorilik sodir etgan.
S.R. sudda viloyatliklarga nisbatan haqoratli so‘zlarni salbiy fikr bildirgan kuzatuvchilariga javob tariqasida aytib yuborganligini, bu qilmishidan chin ko‘ngildan pushaymonligini taʼkidlagan. U barchadan uzr so‘rashini aytgan va suddan o‘ziga nisbatan yengillik berishni so‘ragan.
Jinoyat ishlari bo‘yicha Chirchiq shahar sudining qarori bilan qizga Maʼmuriy javobgarlik to‘g‘risidagi kodeksning 183-moddasida (mayda bezorilik) nazarda tutilgan huquqbuzarlikni sodir etganlikda aybli deb topilgan. Unga nisbatan 10 sutka maʼmuriy qamoq jazosi tayinlangan.
Iyun oyida 21 yoshli qiz viloyatliklarni tilga olib bo‘lmas so‘zlar bilan haqorat qilib, shu qilmishi uchun 15 sutkaga qamalgandi. Shuningdek, iyul oyi o‘rtasida Instagramʼdagi jonli efirda “qishloqilar odammas” deya haqoratlagan qiz jarimaga tortilgan edi.
Izoh (0)