Марказий банк автокредит олиш ҳақида қўлланма тақдим этди.
Автокредит – бу истеъмол кредитининг бир тури бўлиб, тижорат банклари томонидан жисмоний шахсларга айнан автомобиль сотиб олиш учун ажратилади.
Автокредит кимларга берилади?
18 ёшдан катта, мунтазам расмий даромадга эга Ўзбекистон фуқароларига ва мамлакат ҳудудида расмий фаолият олиб бораётган норезидент шахсларга автокредит ажратилади.
Қандай автотранспортларни сотиб олиш мумкин?
Ҳозирги кунда, автокредит Ўзбекистонда ишлаб чиқарилган автотранспортларни сотиб олиш учун ажратилмоқда.
Баъзи тижорат банклари иккиламчи бозордан автомобиль сотиб олиш учун автокредит ажратади.
Ҳужжатлар
- шахсни тасдиқловчи ҳужжат;
- даромадлар ҳақида иш жойидан маълумотнома;
- автомобиль сотиб олиш шартномасининг нусхаси;
- кредит қайтарилиши таъминотига доир ҳужжатлар.
Тижорат банкининг ички сиёсатидан келиб чиқиб, автокредит таъминоти учун қуйидагилардан бирини гаровга қўйилиши мумкин:
- Кредит ҳисобига сотиб олинаётган автомашина;
- Кўчмас ва кўчар мулк;
- Суғурта полиси;
- Учинчи шахс кафиллиги;
- Ўзбекистон Республикаси қонуни билан тақиқланмаган бошқа гаров турлари.
Кредитни тўлаш усули – аннуитет (кредит муддати давомида бир хил тўлов) ёки дифференсиал (ойма-ой камайиб бориш тартибида) бўлиши мумкин.
Имтиёзли давр – банк кредит бўйича асосий қарз тўловларини талаб этмайдиган давр. Ушбу давр мобайнида фақатгина кредит фоизлари тўланади.
Бошланғич тўловни амалга ошириш учун маблағ етарли бўлмаган ҳолда, бошқа кредит (масалан, микроқарз) олиш маслаҳат берилмайди, чунки бу қарздорнинг қарз юкини ошириб юборишга олиб келиши мумкин.
Автокредит – бу жавобгарлик. Агар кредит бўйича тўловлар ўз вақтида амалга оширилмай қолса, бу салбий кредит тарихига сабаб бўлиши мумкин. Бундай вазиятда муддати ўтган қарздорликлар кредит таъминоти бўлган машинани сотиш эвазига қопланиши мумкин.
Февралда автокредитлар бўйича фоиз ставкалар 19 фоиздан 27 фоизгача бўлган эди. Асосий ставка кўтарилгандан кейин улар яна 2-3 фоизга ошган.
Изоҳ (0)