Самарқандда 700 млн сўм кредит ажратиб бериш эвазига пул талаб қилган банк ходими ушланди 

Давлат хавфсизлик хизмати Самарқанд вилояти бошқармаси ходимлари томонидан коррупция ва манфаатлар тўқнашувига барҳам бериш борасида тезкор тадбирлар ўтказилди.

Қайд этилишича, шундай тадбирларнинг бирида Самарқанд шаҳрида яшовчи, “Ипотека-банк” акциядорлик тижорат ипотека банкининг “Сўғдиёна” банк хизматлари марказида молиявий консултант лавозимида ишлаб келаётган 36 ёшли М.Ж. банк мижози бўлган маҳаллий фуқарога 700 миллион сўм миқдорида ипотека кредити расмийлаштириб беришда ёрдам беришини айтиб, эвазига 20 миллион сўм ва 100 доллари миқдоридаги пул маблағини талаб қилиб келаётгани аниқланган.

Шундан сўнг, ДХХ Самарқанд вилояти бошқармаси ҳамда вилоят ИИБ ходимлари билан ҳамкорликда ўтказилган фаол тадбирда М.Ж. маҳаллий фуқародан аввалдан келишилган 20 миллион сўм ва 100 долларни олган вақтида ушланиб, процессуал тарзда расмийлаштирилган.

Ҳозирда ҳолат юзасидан ушбу шахсга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.

Аввалроқ Фарғона вилоятининг Қўқон шаҳрида 19 нафар фуқаро номига автокредит расмийлаштириб ўзлаштирган шахслар аниқлангани тўғрисида хабар берилганди. Май ойида эса Тошкент вилоятида ўзини банк ходими деб таништириб, ўзганинг номига кредит расмийлаштирган шахс ушланган эди.