Қашқадарё вилоятининг Китоб тумани ҳамда Андижон шаҳрида имтиёзли кредит маблағларини қўлга киритган шахслар аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Китоб туманида банк бошқарувчиси собиқ ўринбосари О.Х. “В.” фермер хўжалиги раҳбари Б.Р. билан ўзаро тил бириктирган. Сўнг 6 нафар фуқаронинг номига ажратилган 163 млн сўм имтиёзли кредит маблағини “В.” фермер хўжалиги ҳисоб рақамига ўтказиш орқали нақдлаштириб олган.
Шунингдек, Андижон шаҳрида фуқаро А. ва бошқалар фуқаро С.М.нинг ишончига кириб, унга банкдан 100 млн сўм имтиёзли кредит ажратиб беришларини ваъда қилган. Сўнг унинг турмуш ўртоғи ЯТТ Г.М.нинг номига 100 млн сўм имтиёзли кредит ажратилишига эришиб, ушбу маблағларни “Р.Н.” МЧЖ орқали нақдлаштириб олган.
Мазкур ҳолатлар юзасидан Жиноят кодексининг тегишли моддаси билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)