Ўзбекистонда сентябр ойи охирига келиб иккиламчи бозорда автомобиллар нархи тушаётгани ҳақида хабарлар тарқалди. Улардан бирида айтилишича, машина бозорида нархлар кескин тушиши кузатилмоқда.
Нарх-наво “ташлаяпти”. Майли, тушаверсин. Акажон, камбағал ҳам машина минсин. Бизларга нархи қанча тушса, шунча яхши. Иложи бўлса, машина олманглар. Булар 15-18 минг долларга арзийдиган машиналар эмас. Тўғрисини айтган яхши, иложи бўлса олманглар, оғайнилар. Тушсин нарх-наво. 10 минг бўлсин. Маза қилиб олиб мининглар, бизлар ҳам маза қилиб сотайлик, — дейди машиналар савдоси ҳақида фикр билдирган автомобиль бозоридаги киши.
Иқтисодчи Отабек Бакиров ҳам ўзининг Telegram каналида сентябр ойи охирида эълон қилган постида иккиламчи автомобиль бозорида нархлар туша бошлаганига урғу берган.
“Охирги икки ҳафтадаги кузатувлар шуни кўрсатмоқдаки, иккиламчи автомобиль бозорида энг ликвид ҳисобланган Lacetti, Cobalt ва Damas автомобиллари нархида сезиларли даражада пасайиш юз бермоқда.
Сентябр бошида янги Lacetti прейскурант ва бозор нархида 5-6 минг долларлик фарқ бўлган бўлса, ҳозир бу фарқ узоғи 3-4 минг долларгача қисқарган, янги Cobalt нархидаги фарқлар 5-6 минг доллардан 4-5 минг долларгача, янги Damas нархидаги фарқлар эса 3-3,5 минг доллардан 2,5-3 минг долларгача пасайган. 2022 йилгача ишлаб чиқарилган автомобиллар нархида ҳам 10 фоиз атрофида пасайиш тенденцияси мавжуд”, деб ёзади иқтисодчи.
Отабек Бакиров мазкур жараённи уч омил билан: биринчиси, августдаги қўшимча янги автомобиллар бозорга фаол олиб чиқилаётгани, иккинчидан, август ойидан бошлаб банклар автокредит бериш талабларини анча қаттиқлаштиргани, учинчидан эса пул ўтказмалари қисқараётгани ва нархлар долларда белгиланиши билан боғламоқда.
Ҳақиқатан ҳам иккиламчи бозорда автомашиналар нархи тушмоқдами? Буни ўрганиш мақсадида “Дарё” мухбири Тошкент шаҳридаги Сергели автомобиль бозоридан репортаж тайёрлади.
Бозорда 20 йилдан буён автомобиль савдоси билан шуғулланувчи Комил Йўлдошевнинг айтишича, ҳақиқатан ҳам нархлар тушган.
“Масалан, аввал Tracker’нинг премиeр версияси 26 минг доллардан сотилаётган бўлса, ҳозир 22 минг доллардан сотувда турибди, ҳатто 21,5 минг долларга ҳам бор. Malibu ҳам тушган, аввал 34 минг доллар деб сотилаётгани 32 мингдан сотилмоқда”, — деди у.
Комил Йўлдошевнинг таъкидлашича, автомобилларнинг нархи тушиши валюта курсининг кўтарилиши ва айрим банкларда автокердитларнинг ёпилгани билан боғлиқ.
Яна бир сотувчи Икром Иброҳимовнинг айтишича, нархларнинг тушиши UzAuto Motors томонидан автомобиллар учун шартномалар тузиб, эгаларига тезроқ етиб бораётгани билан боғлиқ.
“Икки ойдан бери савдо йўқлигининг ҳисобидан нархлар “қайтиб” қолди. UzAuto Motors шартномаларни қанча очаверса, нарх шунча ташлайверади. Ҳаммаси UzAuto Motors’га боғлиқ. Агар шартномани ёпиб қўйса, нарх-наво ҳам “осмон”га кўтарилади. Мана шунақа тез-тез тўлаб, бир ойда машина бераверса, нархлар бундан ҳам пастга тушиб кетаверади.
Гувоҳи бўлганимиз, Gentra’лар 18 минг доллар эди, ҳозир 15 минг доллардан беряпти. Malibuъни 30 минг доллардан сотаётгандик, ҳозир 27 минг доллардан сотяпмиз. Керак бўлса зарарига ҳам бермаймиз. Мисол учун: Jetour машинасини 3,5-4 минг доллар зарарига ҳам сотдик. Monza’лар нархи тушиб кетди”, — деди сотувчи.
Яна бир суҳбатдошнинг алоҳида таъкидлашича, нархлар асосан янги автомашиналар билан кўпроқ фарқланмоқда. Эски машиналарда эса катта ўзгариш сезилмаган.
“Автосалонларда шартнома очилгандан бери эски Cobalt нархи 500 долларга тушди. Лекин жуда тушиб кетгани йўқ. Янги машиналар бир оз арзонлашди”, – деди сотувчи Файзулла Аҳмедов.
Асосан Cobalt савдоси билан шуғулланувчи Шавкат Одиловнинг маълум қилишича, янги Cobalt 16 минг доллардан 13 минг долларга тушган. Бозор ва автосалон нархи бир-бирига яқинлашиб қолган, ўртада 1000-500 доллар атрофида фарқ бор.
Хўш, электромобилларчи? Уларда ҳам нархлар арзонламоқдами? Ушбу саволга жавоб олиш мақсадида “Дарё” мухбири электромобиллар бўйича эксперт Мирзоҳид Ҳамроевдан изоҳ олди.
“Электромобил бозорида ҳам нархлар арзон бўляпти. Бирданига 3-4 мингга арзон бўлгани йўқ, лекин сезиларли даражада арзонлашди. Тахминан, 500-1000 доллар атрофида арзонлашяпти. Менимча, бу тўхтайди. Бутунлай арзон бўлиб кетмайди. Чунки олдин ҳам BYD Song Plus бошида 43-44 минг доллар эди. Охири тақалиб 37 минг долларга тўхтаб қолди, ундан тушмади. Кейин янги BYD Таng чиққандан кейин унинг нархи 34 минг долларда тўхтади, бошқа тушадиган жойи йўқ”, — деди Мирзоҳид Ҳамроев.
UzAuto Motors расмий сайтида 18-сентябр куни Chevrolet Cobalt, Lacetti, Damas ва labо автомобиллари учун шартномалар тузиш бошлангани эълон қилганди. Ўша куннинг ўзида Cobalt, Lacetti учун шартномалар тугагани маълум қилинган. Иш вақти тугади деган важ билан барча автосалонларда шартнома бериш тўхтатилганди.
Шартномалар тезда тугаб қолгани боис шартнома ололмаган харидорлар “Дарё” журналисти билан суҳбатда “Автосалонлар ўнта машина сотиб, салонни ёпса, нега эълон беради” деган мазмунда UzAuto Motors’га саволлар ёғдирганди.
Изоҳ (0)