Белгород вилоятида ҳалокатга учраган Россиянинг Ил-76 самолёти бортида россиялик амалдорлар бўлиши керак эди, бироқ сўнгги лаҳзада ФСБ (Федерал хавфсизлик хизмати) уларга самолётга чиқишни тақиқлаган. Бу ҳақда Украина разведкасининг расмий вакили Андрей Юсов хабар берди.
“Ҳақиқатан ҳам бортда агрессор давлатнинг ҳарбий-сиёсий ваколатхонасидан бир нечта расмий VIP персоналар бўлиши керак эди. Уларнинг исмлари маълум ва эълон қилинади, халқаро тергов доирасида материаллар тақдим этилади. Аммо сўнгги дақиқада ФСБ ҳақиқатда уларга бу бортга чиқмасликни ва бошқа транспорт турларидан фойдаланишни буюрган. Бу маълумотлар воқеа содир бўлганидан кейин аниқланган”, — дейди Юсов.
Шунингдек, у россиялик қутқарувчиларга ҳалокат жойини текширишга рухсат берилмаганини айтди.
“Воқеа жойига етиб келган Россия Фавқулодда вазиятлар вазирлиги вакиллари ФСБ ва ҳарбийлар томонидан ҳақиқатда чиқариб юборилган ва уларга протоколга кўра, воқеа жойида текширув ўтказиш имконияти берилмаган”, — деди Украина Бош разведка бошқармаси вакили.
Бундан ташқари, у ҳалокат жойидан олинган видеода инсон жасадлари қолдиқлари кўрсатилмагани ва ҳалокат куни Белгороддаги маҳаллий ўликхонага фақат бешта жасад етказилганини маълум қилди.
Белгородда Ил-76 ҳалокати
24 январь куни Россиянинг Белгород вилоятида Ил-76 самолёти ҳалокатга учради. Россия Мудофаа вазирлигининг даъво қилишича, бортда 74 киши бўлган: 65 нафар украиналик ҳарбий асир, уч нафар рус аскари ва олти нафар экипаж аъзоси. Россия расмийларига кўра, уларнинг барчаси вафот этган.
Россия Мудофаа вазирлиги Ил-76 ҳалокатини теракт деб атади ва бунда Украина ҳарбийларини айблади. Украина ҳукумати ҳалокат учун жавобгарликни ўз зиммасига олмади, аммо самолёт ҳалокатида Россияни айбламади ҳам. “Украинская правда” нашри Украина Қуролли кучларидаги манбаларга таяниб, руслар Ил-76 да Харьковга тез-тез ўқ узадиган С-300 ҳаво мудофаа тизими учун ракеталарни ташиганини маълум қилди.
Кейинчалик, Украина разведкаси 24 январь куни маҳбуслар алмашинуви бўлиши кераклигини тасдиқлади, аммо бу жараён тўхтатилди. Украина томонида Ил-76 бортида ким бўлгани ҳақида ишончли маълумотлар йўқлигини қўшимча қилди. Россия авиаҳалокатда пайтида ҳалок бўлган 65 нафар украиналик асирлар рўйхатини эълон қилди. Бироқ украиналик журналистларга кўра, рўйхатдаги камида 17 киши 3 январь куни асирлар алмашинуви доирасида ватанига қайтган.
Ўз навбатида, Россия асирлар қайси йўналишда, транспортда ва неча киши бўлгани ҳақида Украинани огоҳлантирмаган. Аввалги асирлар алмашинувида руслар украинларни бу борада огоҳлантириб келганди. Украина Хавфсизлик хизмати Ил-76 самолётининг ҳалокатга учраши бўйича тергов бошлаган.
Изоҳ (0)