Украина Миллий хавфсизлик ва мудофаа кенгаши котиби Алексей Данилов 24 январь куни Белгородда ҳалокатга учраган Ил-76 бортида украиналик ҳарбий асирлар бўлмаганини айтди. Бу ҳақда у Babel нашрига берган интервьюсида маълум қилди.
“Бизнинг ҳарбий асирларимиз у ерда бўлганмиди, сизга аниқ йўқ, деб айта оламан. Буни Теҳрондан кейинги тажрибамиз ва ундан кейин содир бўлган воқеалардан келиб чиқиб айтяпман. Агар шундай бўлганида, унда биологик моддалар миқдори, айтайлик, ўликлар сезиларли даражада кўп бўлар эди”, — деди Данилов.
2020 йилнинг 8 январь куни Теҳрон аэропортидан ҳавога кўтарилган Украина халқаро авиакомпаниясининг Boeing 737-800 самолёти уриб туширилди. 176 киши ҳалок бўлди. Тергов шуни кўрсатдики, самолёт Эрон ҳаво ҳужумидан мудофаа тизими томонидан янглишиб уриб туширилган.
Шунингдек, Данилов агар самолёт бортида ҳақиқатан ҳам украиналик ҳарбийлар бўлса, Россия томони ҳалок бўлганлар тасвирини кўрсатмасдан қолмаслигини айтди, аммо ҳозир унинг фикрича, “кўрсатишга ҳеч нарса йўқ”.
Украина томони, дея қўшимча Данилов, 24 январь куни алмаштирилиши керак бўлган асирлар ҳали ҳам тирикми ёки йўқлигини билмайди.
Белгородда Ил-76 ҳалокати
24 январь куни Россиянинг Белгород вилоятида Ил-76 самолёти ҳалокатга учради. Россия Мудофаа вазирлигининг даъво қилишича, бортда 74 киши бўлган: 65 нафар украиналик ҳарбий асир, уч нафар рус аскари ва олти нафар экипаж аъзоси. Россия расмийларига кўра, уларнинг барчаси вафот этган.
Россия Мудофаа вазирлиги Ил-76 ҳалокатини теракт деб атаган ва бунда Украина ҳарбийларини айблаган. Украина ҳукумати ҳалокат учун жавобгарликни ўз зиммасига олмаган, аммо самолёт ҳалокатида Россияни айбламаган ҳам. “Украинская правда” нашри Украина қуролли кучларидаги манбаларга таяниб, руслар Ил-76 да Харьковга тез-тез ўқ узадиган S-300 ҳаво мудофаа тизими учун ракеталарни ташиганини маълум қилган.
31 январь куни Путин Ил-76 самолёти Америка Патриот тизими томонидан уриб туширилганини, экспертиза буни аниқлаганини даъво қилган.
Кейинчалик, Украина разведкаси 24 январь куни маҳбуслар алмашинуви бўлиши кераклигини тасдиқлаган, аммо бу жараён тўхтатилган. Украина томонида Ил-76 бортида ким бўлгани ҳақида ишончли маълумотлар йўқлигини қўшимча қилган.
Ўз навбатида, Россия асирлар қайси йўналишда, транспортда ва неча киши бўлгани ҳақида Украинани огоҳлантирмаган. Аввалги асирлар алмашинувида руслар украинларни бу борада огоҳлантириб келганди. Украина Хавфсизлик хизмати Ил-76 самолётининг ҳалокатга учраши бўйича тергов бошлаган. Зеленский эса Ил-76 ҳалокати бўйича халқаро тергов ўтказишни талаб қилган.
Изоҳ (0)