Россия президенти Владимир Путин Белгородда Ил-76 самолётини Россия ҳаво ҳужумидан мудофаа тизими уриб туширмагани, сабаби ҳеч қандай рус авиатехникасига нисбатан бундай ҳолатлар кузатилмаганини маълум қилди. Украина разведкаси Путиннинг мазкур баёнотига ишора қилиб, Россия президенти ёлғон гапираётганини маълум қилди.
“Бу вазиятда Путинга ўхшаган шахснинг сўзларига келсак, у ҳар доимгидек айёрлик қилмоқда. Биринчидан, Россия ҳаво мудофааси ва ракетага қарши мудофаа тизимлари томонидан рус самолётларининг уриб туширилиши бир неча бор Россияда ва босиб олинган ҳудудларнинг фронт чизиғида қайд этилган. Бундан ташқари, агар биз ‘дўст ёки душман’ тизими ҳақида гапирадиган бўлсак, у ҳар доим ҳам ишламайди, Белгороддаги тизимларни ҳисобга олганда эса, бу умуман аргумент эмас”, — деди Украина разведкаси вакили Андрей Юсов.
Разведка расмийси шу сабабли Россия президентининг баёнотлари кўпроқ “баҳона” ҳисобланишини айтди. Шунингдек, у БМТ Хавфсизлик кенгаши йиғилишида Россия уриб туширилган самолёт бортида украиналик ҳарбий асирлар борлиги ҳақида ҳеч қандай тафсилот ва далил келтирмаганини таъкидлади.
“Биз ҳақиқатан ҳам баъзи ташвиқот баёнотлари оқимидан ташқари, фактдан иборат маълумотлар тақдим этилишини кутган эдик. Биз янги ҳеч нарса кўрмадик, шунинг учун тергов давом этмоқда. Самолётда бўлган одамларнинг тақдирига келсак, албатта, буни аниқлаш учун бор кучимизни сарфлашимиз керак, бу албатта амалга оширилади. Украина учун халқаро тергов мавзуси аниқ ҳал қилинмаган”, — деди Юсов.
Белгородда Ил-76 ҳалокати
24 январь куни Россиянинг Белгород вилоятида Ил-76 самолёти ҳалокатга учради. Россия Мудофаа вазирлигининг даъво қилишича, бортда 74 киши бўлган: 65 нафар украиналик ҳарбий асир, уч нафар рус аскари ва олти нафар экипаж аъзоси. Россия расмийларига кўра, уларнинг барчаси вафот этган.
Россия Мудофаа вазирлиги Ил-76 ҳалокатини теракт деб атади ва бунда Украина ҳарбийларини айблади. Украина ҳукумати ҳалокат учун жавобгарликни ўз зиммасига олмади, аммо самолёт ҳалокатида Россияни айбламади ҳам. “Украинская правда” нашри Украина Қуролли кучларидаги манбаларга таяниб, руслар Ил-76 да Харьковга тез-тез ўқ узадиган С-300 ҳаво мудофаа тизими учун ракеталарни ташиганини маълум қилди.
Кейинчалик, Украина разведкаси 24 январь куни маҳбуслар алмашинуви бўлиши кераклигини тасдиқлади, аммо бу жараён тўхтатилди. Украина томонида Ил-76 бортида ким бўлгани ҳақида ишончли маълумотлар йўқлигини қўшимча қилди. Россия авиаҳалокат пайтида ҳалок бўлган 65 нафар украиналик асирлар рўйхатини эълон қилди. Бироқ украиналик журналистларга кўра, рўйхатдаги камида 17 киши 3 январь куни асирлар алмашинуви доирасида ватанига қайтган.
Ўз навбатида, Россия асирлар қайси йўналишда, транспортда ва неча киши бўлгани ҳақида Украинани огоҳлантирмаган. Аввалги асирлар алмашинувида руслар украинларни бу борада огоҳлантириб келганди. Украина Хавфсизлик хизмати Ил-76 самолётининг ҳалокатга учраши бўйича тергов бошлаган.
Изоҳ (0)