Қашқадарё вилоятининг Яккабоғ туманида 30 ёшли аёл эҳтиётсизлиги оқибатида ўзини ов милтиғи билан отиб қўйди.
Бош прокуратура ахборот хизмати раҳбари Ҳаёт Шамсутдиновнинг “Дарё”га маълум қилишича, фуқаро Қ.Н. 2013 йилда ўзига бириктирилган отиш учун яроқли бўлган “Тоз-16” русумли ов қуроли ва унинг ўқларини сақлашда бепарволик қилган.
2024 йил 22 сентябрь куни ов қуролини “Ҳусен” қишлоғида жойлашган молхона биноси ёнидаги омборхонада жойлашган сейфга тиқиб қўйишни унутиб, очиқда қолдирган. Ўша куни соат 14:30 ларда унинг 30 ёшли келини М.Ж. молхонани тозалаш учун кирган ва эҳтиётсизлик қилиб қуролни сейфга жойламоқчи бўлган. Шунда милтиқ отилиб кетган ва ўқ аёлнинг бошига тегиб уни жароҳатлаган. Оқибатда аёл воқеа жойида ҳалок бўлган.
Мазкур ҳолатда қурол сақлашда эҳтиётсизлик қилган Қ.Н.нинг ҳаракатларида жиноят таркиби бўлгани учун 24 сентябрь куни унга нисбатан туман прокуратураси томонидан Жиноят кодексининг 249-моддаси (қуролни ва унинг ўқ-дориларини сақлаш, олиб юриш, ташиш қоидаларини бузиш) билан жиноят иши қўзғатилган. Қўзғатилган жиноят иши Яккабоғ туман ИИБ ҳузуридаги тергов бўлимига юборилган.
Шу каби ҳолат Қашқадарёда бир неча йил олдин ҳам содир бўлганди. 17 ёшли йигит бобосининг ов милтиғи билан тасодифан ўзини отиб қўйган. У ўқни алмаштираётган вақтида эҳтиётсизлиги оқибатида милтиқ отилиб, ўқ ўнг оёқ тизза қисмига тегиб, жароҳат билан касалхонага ётқизилган.
Бухорода 32 ёшли эркак пневматик қуролни қўлига олган ва эҳтиётсизлиги сабаб тана қисмига яқин тутган ҳолда тепкини босиб юборган. Оқибатда чап кўкрак қисми жароҳатланиб, вафот этган.
Изоҳ (0)