Ёзувчи Собир Ўнар муаллифлигидаги “Бибисора” асари (қисса ва ҳикоялар тўплами) нашриёт томонидан рухсатсиз чоп этилганлиги учун тегишли чора кўрилиши юзасидан мурожаат келиб тушган. Бу ҳақда Адлия вазирлиги ахборот хизмати хабар бермоқда.
Мурожаат ўрганилганида нашриёт томонидан “Бибисора” асари ҳуқуқ эгаси рухсатисиз, тегишли шартнома тузмасдан нашр этилгани ҳамда 2 минг ададда чоп этиб, тарқатилганлиги аниқланган. Ҳолат юзасидан адлия органлари томонидан жамият раҳбарига нисбатан маъмурий ҳуқуқбузарлик тўғрисида баённома расмийлаштирилиб, судга юборилган.
Жиноят ишлари бўйича Шайхонтоҳур туман судининг қарорига асосан жамият раҳбарига Маъмурий жавобгарлик тўғрисидаги кодекснинг 177 прим 1-моддаси (муаллифлик ҳуқуқини ва турдош ҳуқуқларни бузиш) билан 1 миллион 700 минг сўм жарима жазоси қўлланилган.
Маълумот учун, Собир Ўнар 1964 йил 25 февралда Самарқанд вилоятининг Қўшработ туманида туғилган. ТошДУнинг журналистика факультетини тамомлаган. 1986 йилдан бошлаб “Ёшлик” журналида адабий ходим сифатида фаолиятини бошлаб, бўлим мудири, бош муҳаррир ўринбосари, бош муҳаррир вазифаларида ишлаб келган.
Унинг асарлари республика нашриётларида 1984 йилдан буён чоп этиб келинади. “Орзулар билан бурканган қишлоқ” (1989), “Узоқ далалар ортида” (1990), “Чамбилбелнинг ойдаласи” (2006), “Бибисора” (2011) китоблар муаллифи. Қорақалпоқ адиби Х.Тожимуродовнинг “Ов ҳангомалари” (1990) ҳамда турк ёзувчиси Бакир Юлдузнинг “Карбало фожиаси” қиссасини ўзбек тилига таржима қилган.Адиб 2022 йилнинг августида “Дўстлик” ордени билан мукофотланган.
Ўзбекистон ёзувчилари уюшмаси аъзоси Собир Ўнар 2022 йили 58 ёшида вафот этган.
Изоҳ (0)