Украинанинг Миллий коррупцияга қарши бюроси (НАБУ) Украина мудофаа вазири Рустем Умеровнинг эҳтимолий жинояти бўйича Украина Коррупцияга қарши кураш марказининг (КҚКМ) аризаси асосида иш юритишни рўйхатдан ўтказди.
Украина Мудофаа вазирлиги раҳбари ҳокимият ёки лавозим мавқейини суиистеъмол қилишда гумон қилинмоқда. Ушбу модда уч йилдан олти йилгача озодликдан маҳрум қилиш жазосини назарда тутади.
КҚКМ маълумотларига кўра, 24 январь куни Умеров Мудофаа харидлари агентлиги (МХА) кузатув кенгашининг директори Марина Безрукова билан шартномани бир йилга узайтириш тўғрисидаги қарорини бажаришдан бош тортган.
Вазир, шунингдек, ушбу қарорни ёқлаб овоз берган кузатув кенгашининг икки аъзоси — Тарас Чмут ва Юрий Жигирани ҳам ишдан бўшатган, деб айтилади Коррупцияга қарши кураш маркази хабарида.
Шунингдек, марказда мудофаа харидлари агентликлари ҳузурида кузатув кенгашларини ташкил этиш ушбу тузилмаларни ташқи таъсирдан ҳимоя қилиш учун НАТОнинг асосий тавсияси бўлгани таъкидланди.
Умеров ҳарбий харидлар ва армияни таъминлашдаги муаммолар учун Безруковани айблаган.
Олий Рада Умеровнинг сўроқ учун чақирилишини қўллаб-қувватлади
2024 йил 3 декабрь куни Олий Рада Украина ҳарбийлари томонидан “Укроборонпром” ишлаб чиқарган сифатсиз миналарни олганликда айбланган Умеровнинг сўроққа чақирилишини қўллаб-қувватлади.
Умеров аввалроқ “Рамштейн” форматидаги Алоқа гуруҳининг 25-йиғилишида тақдим этилган Украинанинг 2025 йилга мўлжалланган ҳарбий стратегияси ҳақида маълумот берган эди.
“Учрашув давомида биз тўртта асосий устуворликка асосланган стратегиямизни тақдим этдик: фронт чизиғини барқарорлаштириш, Украинанинг мудофаа қобилиятини мустаҳкамлаш, ҳаво ва денгиз йўлларини ҳимоя қилишни кучайтириш, босқинчининг кенг кўламли устунликка эришишга уринишларига муносиб жавоб бериш”, деб ёзган Умеров Facebookъдаги саҳифасида.
У “имкониятлар коалицияси: авиация, ҳаво ҳужумидан мудофаа, денгиз имкониятлари, артиллерия, зирҳли техника, IT, дронлар ва миналардан тозалаш технологиялари” доирасида ишлаб чиқилган Украина мудофаа кучларини 2027 йилгача ривожлантириш бўйича “йўл харитаси” тасдиқланганини айтди.
“Биз ҳамкорликнинг янги босқичига қадам қўйдик: урушнинг долзарб эҳтиёжларини қондиришдан ташқари, армиямизнинг узоқ муддатли салоҳиятини шакллантириш устида ҳам иш олиб борамиз”, дея хулоса қилган Умеров.
Изоҳ (0)