АҚШ мудофаа вазири Ллойд Остиннинг айтишича, Америка қуроллари Украинага “барқарор равиш”да етказиб берилади. Унинг таъкидлашича, Украина иттифоқчиларининг ҳарбий ёрдамлари жанговар ҳаракатлар жараёнига таъсир қилади.
Бугун, 20 май куни Украинага қурол етказиб беришни мувофиқлаштириш бўйича алоқа гуруҳининг виртуал форматдаги йиғилиши бўлиб ўтди. Унда Остиндан ташқари, Украина мудофаа вазири Рустем Умеров ва Украина Қуролли кучлари Олий Бош Қўмондони Александр Сирский иштирок этди.
АҚШ мудофаа вазири ўзининг кириш сўзида учрашув Россия қўшинлари Украина ҳудудига янги ҳужум бошлаган пайтда “жуда оғир паллада” бўлаётганини таъкидлади.
“Аммо биз Украинага керакли ёрдамни беришда давом этамиз. Қўшма Штатлар ўз вазифасини бажаришга содиқ қолади. Қўшимча маблағлар ўтиши билан биз Украина учун муҳим ёрдам пакетларини тасдиқлашда давом этамиз. Сиз шу кунларда Украинага Америка ёрдамининг барқарор оқимини кўрасиз”, — деди Ллойд Остин.
Изоҳ (0)