22 апрель куни Люксембургда Европа Иттифоқи мамлакатлари мудофаа вазирлари иштирокида Украинага қурол етказиб бериш муҳокама қилинади, деди Европа Иттифоқи дипломатияси раҳбари Жосеп Боррелнинг матбуот котиби Питер Стано.
“Биз Украинанинг эҳтиёжларидан тўлиқ хабардормиз ва бу эҳтиёжларни аъзо давлатлар етказиб бериши мумкин бўлган барча нарсалар билан қондиришга ҳаракат қилмоқдамиз. Бўлажак тадбирда Европа Иттифоқига аъзо давлатлар Украинага қандай ёрдамни қачон жўнатишлари мумкинлигини аниқлаштириб олишлари керак бўлади”, — деди Стано.
Унинг сўзларига кўра, “аъзо давлатлар Украинага ўзини ҳимоя қилиш учун қўлларидан келганча ёрдам бермоқда”. Бу ёрдам кетма-кет учинчи йил кўрсатилмоқда ва бундай ҳолат илгари ҳеч қачон кузатилмаган.
Шу билан бирга, Стано Эроннинг Исроилга ҳужуми ва Украинадаги воқеалар ўртасида ўхшашлик изламасликка чақирди.
Европа Иттифоқи Кенгаши веб-сайтининг хабар беришича, ташқи ишлар вазирлари 22 апрель куни Украина ташқи ишлар вазири Дмитрий Кулеба ва мудофаа вазири Рустем Умеров билан видеоконференция орқали норасмий фикр алмашганидан кейин Украинадаги вазиятни муҳокама қилади.
“Кейинги мунозара Европа Иттифоқи ташқи ишлар ва мудофаа вазирлари иштирокида қўшма йиғилишда бўлиб ўтади”, — дейилади хабарда.
Изоҳ (0)