Европа Иттифоқи бошқа давлатларни Сурия, Венесуэла, Эрон ва Шимолий Кореядан коронавирус тарқалиши муносабати билан тиббий ва гуманитар ёрдам кўрсатишга тўсқинлик қилувчи санкцияларни бекор қилишга чақирди. Бу ҳақда ЕИ дипломатияси раҳбари Жозеп Боррелга таяниб, «ТАСС» хабар берди.
«Бизнинг санкцияларимиз гуманитар ёрдам кўрсатишга халақит бермаяпти. Бошқа мамлакатлар ҳам шундай йўл тутиб, санкцияга учраган давлатларга тиббиёт қурилмалари етиб боришига ишонч ҳосил қилишини истаймиз. Масалан, Сурия, Венесуэла, Эрон, КХДРга», — дейди Боррель. У пандемия вақтида БМТ бош котибининг санкцияларни ечиш тўғрисидаги чақирувини қўллаб-қувватлашини билдирган.
Ўтган ҳафта Европа Иттифоқининг ташқи ишлар ва хавфсизлик сиёсати бўйича олий вакили ҳам БМТ бош котиби Антониу Гутерришнинг фикрини қувватлаб, G20 давлатларини бошқа давлатларга қўйилган санкцияларни ечишга чақирганди.
БМТ бош котиби 24 март куни барча давлатларни бир қатор мамлакатларга нисбатан мавжуд санкцияларни юмшатишга, шунингдек, ҳарбий ҳаракатларга чек қўйишга чақирган. Аввалроқ БМТ коронавирус туфайли дунёнинг барча мамлакатларини мигрантлар ва қочқинларни озод этишга чақирганди.
Мавзуга доир:
Изоҳ (0)