2023 йилнинг биринчи ярми якунларига кўра, Европа Иттифоқи давлатлари, шунингдек Исландия, Лихтенштейн, Норвегия ва Швейцария (ЕИ+) ҳукуматларига бошпана сўраб мурожаат қилганлар сони 519 минг нафарга етди.
Бу ўтган йилнинг шу даврига нисбатан 28 фоизга кўп ва 2016 йилдан бери энг юқори кўрсаткичдир. Шу билан бирга, ҳисобот муаллифларининг қайд этишича, одатда сўровларнинг аксарияти йилнинг иккинчи ярмига тўғри келади. Агар тенденция тасдиқланса, бу йил ЕИ+ мамлакатларига бошпана сўраб 1 миллиондан ортиқ одам ариза бериши кутилмоқда.
Энг кўп мурожаат Сурия ва Афғонистон фуқароларидан келиб тушган — мос равишда 66 минг ва 55 минг. Кейинги ўринларда Венесуэла, Колумбия ва Туркия жойлашган. Шу билан бирга, Суриядан қочқинлар оқими 2015—2016 йиллардаги инқироздан бери энг юқори даражага етди. Туркия мисолида эса, аризалар сони 2022 йилдаги рекорд миқдордан ўтиб кетди. Қабул қилувчи давлатларга келсак, Германия энг кўп аризаларни қабул қилган — жами 30 фоиз. Бу қочқинлар учун кейинги энг машҳур мамлакатлар — Испания (17 фоиз) ва Франция (16 фоиз)дан деярли икки баробар кўпдир.
Кўп сонли Украина фуқаролари мамлакатни тарк этиб, Европа Иттифоқи давлатларига кетганига қарамай, улар бошпана сўраб мурожаат қилиш бўйича биринчи 10 таликка ҳам кирмайди. Гап шундаки, кўплаб Европа давлатлари расмийлари 2022 йил март ойида ҳарбий можаро бошланганидан кейин Украина фуқароларига автоматик равишда вақтинчалик бошпана бермоқда.
Бу механизм камида 2024 йилнинг мартигача давом этади. Украиналиклар томонидан аризаларининг аксарияти Эстония (жами 36 фоиз), Франция (17 фоиз) ва Польшага топширилган. Ҳаммаси бўлиб, Украина фуқаролари томонидан 7 мингдан кўпроқ ариза топширилди ва уларнинг Европа расмийлари томонидан маъқуллангани 94 фоизга етди.
Изоҳ (0)