2024 йилда Маъмурий судлар томонидан маҳаллий ҳокимликларнинг мингга яқин қарори ҳақиқий эмас деб топилган. Энг кўп бекор қилинган қарорлар бўйича Тошкент, Самарқанд ва Жиззах вилоятлари ҳокимликлари кучли учликдан жой олган.
Давлат раҳбарининг 2023 йил 27 ноябрдаги ПФ-200-сон фармонига кўра, Олий суд томонидан ҳар чорак якуни билан кейинги ойнинг 15-санасига қадар судлар томонидан давлат органлари ва ташкилотлари, уларнинг мансабдор шахсларининг ноқонуний чиқарилганлиги учун бекор қилинган қарорлари тўғрисидаги маълумотларни расмий веб-сайтида очиқ эълон қилиб бориш вазифаси юклатилган.
Таҳлилларга кўра, 2024 йил давомида маъмурий судлар томонидан давлат органлари ва ташкилотлари, уларнинг мансабдор шахслари қарорини ҳақиқий эмас деб топишга доир жами 6991 та иш кўрилган бўлиб, уларнинг 3184 таси қаноатлантирилган. Энг кўп Қашқадарё вилоятида 543 та, Тошкент шаҳрида 465 та ва Наманган вилоятида 303 та қарорлар судлар томонидан ҳақиқий эмас деб топилган.
Маҳаллий ҳокимликлар қарорларининг маъмурий судлар томонидан ҳақиқий эмас деб топиш бўйича 2720 та иш кўриб чиқилган бўлиб, шундан қонунчиликка мос келмайдиган ҳамда фуқаролар ёки юридик шахсларнинг ҳуқуқлари ва қонун билан қўриқланадиган манфаатларини бузадиган жами 933 та ҳолатда қаноатлантирилган ва қарорлар бекор қилинган.
Энг кўп ноқонуний қарорлар Тошкент вилояти ҳокимликларига тегишли бўлиб, ҳудудда амалдорларнинг 426 та қарорига нисбатан шикоят тушган. Судлар томонидан қарорларнинг 143 таси ноқонуний деб топилиб, бекор қилинган. Шунингдек, Самарқанд (128 та) ва Жиззах (113та) вилоятлари ҳокимликлари кучли учликдан жой эгаллаган.
Қайд этиш лозим, 2023 йилда судлар томонидан маҳаллий ҳокимликларнинг 1371 та қарори бекор қилинган.
Аввалроқ Тошкент шаҳар ҳокимликлари томонидан жойлаштирилган ҳужжатларнинг ҳар иккитасидан биттаси “шахсга оид” деган важ билан яшириб қўяётгани, беркитилган ҳужжатларнинг аксарияти молиявий характерга эга эканлиги билдирилганди.
Изоҳ (0)