“Маҳаллалар фаолиятини тартибга солишга доир норматив-ҳуқуқий ҳужжатларни тасдиқлаш тўғрисида”ги ҳукумат қарори қабул қилинди ва кучга кирди.
Ҳужжат билан жамоатчиликни маҳалла еттилиги аъзолари томонидан амалга оширилаётган ишлар тўғрисида хабардор қилиш тартиби тасдиқланди.
Низом маҳалла еттилиги аъзолари — маҳалла раиси, ҳоким ёрдамчиси, ёшлар етакчиси, хотин-қизлар фаоли, профилактика инспектори, ижтимоий ходим ва солиқ инспектори томонидан амалга оширилган ишлар бўйича маҳалла фуқаролар йиғини олдида ҳар чоракда ҳисобот бериш тартибини белгилайди.
Еттиликнинг ҳар бир аъзоси ўз фаолиятининг барча йўналишлари бўйича батафсил ҳисобот беради. Ҳисобот фуқаролар йиғинида ҳар чорак якуни бўйича кейинги ойнинг 10-санасигача эшитилади. Ҳисобот беришда қонунчилик ҳужжатларига мувофиқ қўриқланадиган давлат, хизмат ва солиқ сирларининг муҳофаза қилиниши ҳамда фуқароларнинг шахсий ва оилавий сирларининг дахслисзлиги таъминланади.
Хусусан, фуқаролар йиғини раиси фуқаролар йиғини олдида қуйидаги йўналишлар бўйича ҳисобот беради:
- фуқаролар йиғини томонидан қабул қилинган қарорлар ижроси;
- маҳаллада ижтимоий-маънавий муҳитни соғломлаштириш ва ижтимоий-иқтисодий аҳволни яхшилаш, шу жумладан, маҳалла ободлигини сақлаш ҳамда инфратузилмани ривожлантириш;
- маслаҳат марказлари фаолиятини ташкил этиш;
- кам таъминланган оилалар, етим болалар, ота-онаси қарамоғидан маҳрум бўлган болалар, шунингдек, фавқулодда вазиятлардан жабр кўрган фуқароларга ёрдам кўрсатиш;
- маҳалла еттилигининг коллегиал қарорлари асосида кўрсатилган ижтимоий ёрдам ва ажратилган субсидиялар;
- кексалар муаммоларини манзилли ўрганиш, уларни моддий cа ижтимоий қўллаб-қувватлаш;
- байрам кунлари ва муҳим саналар билан боғлиқ оммавий тадбирлар ўтказилишини ташкил қилиш ва бошқалар.
Кўчабоши ва уйбошилар фаолиятини ташкил этиш тартиби тўғрисидаги намунавий низом ҳам тасдиқланди. У кўчабоши ва уйбоши сайловини ташкил этиш ва ўтказиш тартиби, уларнинг асосий вазифалари ва функциялари, фаолиятини ташкил этиш тартибини белгилайди.
Кўчабоши ва уйбошилар сайлови тегишли ҳудудда доимий ёки вақтинча истиқомат қилаётган фуқароларнинг фуқаролар йиғини раиси раҳбарлигидаги йиғилишда очиқ овоз бериш орқали ўтказилади.
Изоҳ (0)