Сирдарё вилояти ҳокимлиги “Вилоят маҳаллий бюджетининг 2023 йилда шаклланган қўшимча манбалари ҳисобидан маблағ ажратиш тўғрисида”ги қарори лойиҳасини Норматив-ҳуқуқий ҳужжатлар муҳокамаси порталига қўйди. Қарор 11—26 июль кунлари оралиғида жамоатчилик муҳокамасида бўлади.
Унда ёзилишича, Ўзбекистон Республикаси президенти қарор ва фармойишларида, ҳукумат қарорлари ва баёнларида белгиланган топшириқлар ижросини таъминлаш ҳамда ҳудудларни ижтимоий-иқтисодий ривожлантириш, инфратузилма объектларини қуриш ва аҳоли турмуш фаровонлигини ошириш мақсадида амалга ошириладиган харажатлар учун вилоят маҳаллий бюджетининг қўшимча манбалари ҳисобидан қуйидаги йўналишлар учун маблағ ажратилади:
- Вилоят ҳокимлигига қўшимча бино қуриш билан боғлиқ харажатларга — 1 миллиард сўм;
- Хусусий шериклик асосида иситиш тизимига ўтаётган ижтимоий соҳа муассасаларининг иситиш тизимларини модернизация қилиш бўйича лойиҳа-смета ҳужжатларини ишлаб чиқиш ва экспертизадан ўтказиш харажатларига — 1 миллиард 200 миллион сўм;
- 2023 йилда ипотека кредитлари бўйича дастлабки бадалнинг бир қисмини қоплаш ҳамда фоиз тўловларининг бир қисмини қоплаш учун субсидия маблағларини ажратиш харажатларига — 1 миллиард сўм;
- Сирдарё вилояти ҳокимининг ўринбосарларига ҳамда туман ва шаҳар ҳокимларига 16 та Tracker автомашинасини харид қилиш билан боғлиқ харажатларга — 4 миллиард сўм;
- харид қилинган жиҳозларни сақлаш бўйича ижарадан юзага келган қарздорликларни қоплаш харажатларига — 400 миллион сўм.
Давлат молиявий назорати вилоят бошқармаси ажратилган маблағларнинг мақсадли ва самарали ишлатилиши юзасидан якуний текшириш ўтказиб, текшириш натижалари Халқ депутатлари вилоят кенгашига киритиб борилишини таъминлайди. Вилоят Давлат солиқ бошқармаси туман ва шаҳар ҳокимликлари билан биргаликда 2023 йил учун Сирдарё вилояти маҳаллий бюджети даромадлари прогнозини ҳудудлар кесимида бажарилишини таъминлайди.
Изоҳ (0)