ЎзЛиДеП депутати унга қарши босим ва провокациялар бўлаётганини айтди

Халқ депутатлари Учтепа туман кенгашининг депутати Нуриддин Зайнитдинов ўз лавозимини тарк этиб, ЎзЛиДеП партияси сафидан чиқмоқчилигини маълум қилди.

Депутатнинг сўзларига кўра, у мазкур қарорни охирги воқеалар фонида, шунингдек, президент талабларини ўз билганича ишлатадиган раҳбарлар сабаб қабул қилган.

«Gazeta.uz» нашри депутат билан боғланган. У бу провокациялар ортида «туман ва шаҳар ҳокимликларига алоқадор уч-тўрт депутат» турган бўлиши мумкинлигини айтган, бироқ «ахлоқий сабабларга кўра» уларнинг исмларини айтмаган.

Депутатнинг сўзларига кўра, унинг коррупцияга қарши фаолияти, ер билан боғлиқ муаммолар ва январь ойи бошида бўлиб ўтган сайловлар билан боғлиқ ҳодиса маҳаллий ҳокимият вакилларининг норозилигини келтириб чиқарган бўлиши мумкин.

Нуриддин Зайнитдиновнинг қайд этишича, Учтепа туманида «туман ҳокими Фарҳод Абдуллаевнинг тадбиркорларга болалар майдончалари ва кўкаламзорлаштирилган ҳудудлардан ер ажратиш бўйича кўплаб қарорлари бекор қилинган».

Депутат 26-мавзе «Ширин» маҳалласида 32, 22 ва 23-уйлар оралиғидаги 0,2 гектар майдонда савдо-маиший мажмуа ва меҳмонхона қуриш режалаштирилган ҳудуд аҳолисини фаол қўллаб-қувватлаган эди. Туман ҳокими бу жойни «Обод маҳалла» лойиҳаси доирасида «Боғишамол» маҳалласи биноси фасадини таъмирлаш эвазига тадбиркор Қаҳрамон Абдураҳмоновга ажратган.

«Маҳалла биноси фасадини таъмирлаш учун бозор қиймати қарийб 400 минг доллар бўлган 0,2 гектар ер майдони ажратилган. Бу қайси мантиққа мос келади? Қолаверса, аҳолининг уйлари орасидаги яшил ҳудуд сифатида фойдаланиладиган жойда», — дея норози бўлган депутат ҳуқуқ-тартибот идораларидан ер участкаси қандай асосда ажратилганини ўрганишни сўради.

2021 йил май ойида туман прокурорининг протестидан кейин ҳоким 2020 йил 24 ноябрдаги қарорини бекор қилган. Депутатнинг сўзларига кўра, жами «20-30 та ноқонуний ер ажратиш бўйича қарорлар» бекор қилинган.

Нуриддин Зайнитдинов, шунингдек, уни ҳеч қандай исбот-далил ва асосларсиз «Компроматуз» Telegram-каналида мактаб ўқитувчилари ва мактабгача таълим ташкилотлари тарбиячилари «паравоз» услубида тумандаги навбатдан ташқари сайловларда «Адолат» партиясидан номзодларга овоз беришга мажбурлангани қайд этилган постни ёзганликда айблашганини маълум қилган.

Олий Мажлис Қонунчилик палатаси депутати Расул Кушербаевнинг ёзишича, Зайнитдиновга нисбатан босим ва провокациялар яқинда туманда бўшаб қолган ўринларга депутатлик сайловларидан сўнг бошланган. Ўшанда бўшаган учта ўриндан иккитасини ЎзЛиДеП қўлга киритганди.

Аввалроқ Халқ депутатлари Андижон шаҳар кенгашининг 2021 йил 17 май куни ўтказилган навбатдаги сессиясида депутатлар тинтувдан ўтказилгани, сессияда, шунингдек, Андижонда ер сотувчиларнинг кирдикорларини фош қилиб юрган депутат прокурор тақдимномасига кўра дахлсизлик ҳуқуқидан маҳрум қилингани тўғрисида хабар берилганди. Кейинроқ дахлсизлигидан маҳрум бўлган депутат ҳокимлик ва прокуратура босим ўтказаётганини айтган, Андижон шаҳар ҳокими эса сессиядаги ҳолат депутатнинг обрўсини сақлаш мақсадида қилинганини билдирган эди.