2024-yilda Ma’muriy sudlar tomonidan mahalliy hokimliklarning mingga yaqin qarori haqiqiy emas deb topilgan. Eng ko‘p bekor qilingan qarorlar bo‘yicha Toshkent, Samarqand va Jizzax viloyatlari hokimliklari kuchli uchlikdan joy olgan.
Davlat rahbarining 2023-yil 27-noyabrdagi PF-200-son farmoniga ko‘ra, Oliy sud tomonidan har chorak yakuni bilan keyingi oyning 15-sanasiga qadar sudlar tomonidan davlat organlari va tashkilotlari, ularning mansabdor shaxslarining noqonuniy chiqarilganligi uchun bekor qilingan qarorlari to‘g‘risidagi ma’lumotlarni rasmiy veb-saytida ochiq e’lon qilib borish vazifasi yuklatilgan.
Tahlillarga ko‘ra, 2024-yil davomida ma’muriy sudlar tomonidan davlat organlari va tashkilotlari, ularning mansabdor shaxslari qarorini haqiqiy emas deb topishga doir jami 6991 ta ish ko‘rilgan bo‘lib, ularning 3184 tasi qanoatlantirilgan. Eng ko‘p Qashqadaryo viloyatida 543 ta, Toshkent shahrida 465 ta va Namangan viloyatida 303 ta qarorlar sudlar tomonidan haqiqiy emas deb topilgan.
Mahalliy hokimliklar qarorlarining ma’muriy sudlar tomonidan haqiqiy emas deb topish bo‘yicha 2720 ta ish ko‘rib chiqilgan bo‘lib, shundan qonunchilikka mos kelmaydigan hamda fuqarolar yoki yuridik shaxslarning huquqlari va qonun bilan qo‘riqlanadigan manfaatlarini buzadigan jami 933 ta holatda qanoatlantirilgan va qarorlar bekor qilingan.
Eng ko‘p noqonuniy qarorlar Toshkent viloyati hokimliklariga tegishli bo‘lib, hududda amaldorlarning 426 ta qaroriga nisbatan shikoyat tushgan. Sudlar tomonidan qarorlarning 143 tasi noqonuniy deb topilib, bekor qilingan. Shuningdek, Samarqand (128 ta) va Jizzax (113ta) viloyatlari hokimliklari kuchli uchlikdan joy egallagan.
Qayd etish lozim, 2023-yilda sudlar tomonidan mahalliy hokimliklarning 1371 ta qarori bekor qilingan.
Avvalroq Toshkent shahar hokimliklari tomonidan joylashtirilgan hujjatlarning har ikkitasidan bittasi “shaxsga oid” degan vaj bilan yashirib qo‘yayotgani, berkitilgan hujjatlarning aksariyati moliyaviy xarakterga ega ekanligi bildirilgandi.
Izoh (0)