Қашқадарёда фаолият юритувчи ҳокимлар чиқарган қарорларнинг 94 таси судда ҳақиқий эмас деб топилган. Бу ҳақда Қарши шаҳридаги Журналистлар уйида вилоят суди масъуллари билан бўлиб ўтган матбуот анжуманида маълум қилинди, дея хабар берди «Дарё» мухбири.
Таъкидланишича, матбуот анжуманида сўз олган вилоят Маъмурий суди раиси Холис Муҳаммедов суд томонидан 2021 йилнинг ўтган даври мобайнида 947 та иш кўриб чиқилганини маълум қилган.
«Вилоят Маъмурий судлари томонидан 947 та маъмурий иш кўриб чиқилган бўлиб, шундан 476 та даъво аризаси қаноатлантирилган. 256 та ариза рад этилган. 37 та ариза бўйича иш юритишдан тугатилган. 27 та ариза кўрмасдан қолдирилган», — дейди Холис Муҳаммедов.
Суд раисининг маълумот беришича, ўтган давр мобайнида судга маъмурий органнинг қарорларини ҳақиқий эмас деб топиш бўйича 243 та, маъмурий органнинг хатти-ҳаракатларини қонунга хилоф деб топиш бўйича 78 та, сайлов комиссиялари ҳаракатлари юзасидан 4 та, нотариуснинг ҳаракатини қонунга хилоф деб топиш тўғрисида 1 та, давлат рўйхатидан ўтказишни рад этиш устидан 1 та, хусусий нотариус лицензиясининг амал қилиш муддатини тугатиш бўйича 1 та, муайян яшаш жойига эга бўлмаган шахсларни реабилитацияга жойлаштириш бўйича 151 та иш кўриб чиқилган.
2021 йилнинг ўтган даври мобайнида суд томонидан кўрилган ишларнинг 65 тасида тадбиркорлик субъектлари давогар сифатида қатнашган ва 20 та ишда уларнинг даъвоси қаноатлантирилган.
«Ҳоким қарорларини ҳақиқий эмас деб топиш бўйича 243 та иш кўрилган бўлиб, шундан ҳокимлар томонидан чиқарилган 94 та қарор ҳақиқий эмас деб топилган», — дейди Холис Муҳаммедов.
Суд раисининг аниқлаштиришича, вилоятда қарорлари энг кўп бекор қилинган ҳокимлар учлигида Қарши шаҳар, Қарши туман ва Косон тумани ҳокимлари турибди.
Эслатиб ўтамиз, аввалроқ Қарши шаҳар ҳокими вафот этган фуқарога ер бериб, марҳумга 10 кунда ҳужжатларни расмийлаштириш вазифасини юклагани, мазкур ишни судья Азамат Хушвақов кўриб чиқиб, ҳоким қарорини ҳақиқий эмас деб топгани хабар берилганди.
Изоҳ (0)