Самарқандда 2022 йилнинг январь—июнь ойларида 148 та қонунчиликка мувофиқ бўлмаган қарорлар қабул қилинганлиги аниқланган. Бу кўрсатгич 2021 йилга қараганда (340 та) 1,2 бараварга камайган. Бу ҳақда Халқ депутатлари Самарқанд вилоят Кенгашининг етмишинчи сессиясида вилоят Адлия бошқармаси бошлиғи Салоҳиддин Нуриев маълум қилди, дея хабар берди «Дарё» мухбири.
Салоҳиддин Нуриевнинг таъкидланишича, президентнинг 2021 йил 8 июндаги «Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида»ги фармонига мувофиқ 2021 йил 1 августдан бошлаб туман ва шаҳар маҳаллий давлат ҳокимияти органлари томонидан ер участкаларига бўлган ҳуқуқларни белгилаш, эътироф этиш, ўзгартириш, бекор қилиш ваколатлари бекор қилинган, Бироқ Каттақўрғон туман ҳокимлиги томонидан Иска қишлоғида яшовчи фуқаро I.Файзиеванинг ер участкасига ва бино иншоотига нисбатан эгалик ҳуқуқини бекор қилиш юзасидан қарор қабул қилинган.
Шунингдек, Самарқанд шаҳар ҳокимлиги томонидан 2 та, Паст Дарғом туман ҳокимлиги томонидан 10 та ҳолатда ноқонуний қарорлар қабул қилинган. Мазкур ҳолатлар юзасидан вилоят ҳокими номига хат киритилиб, ноқонуний қабул қилинган қарорлар бекор қилинган.
Фармойишларни тизимга жойлаштиришда оддий муддатларга риоя этилмаслиги уларнинг қонунчиликка зид бўлишига сабаб бўлаётгани аниқланган.
Масалан, Қўшработ туман ҳокимининг 2022 йил 30 июндаги фармойиши билан ходим А.Ширинбоевга 2022 йил 24 июндан, яъни 6 кун олдинги сана билан меҳнат таътили берилган.
Салоҳиддин Нуриевнинг маълум қилишича, «E-qaror» электрон тизими орқали вилоят ҳамда туман (шаҳар) ҳокимликлари томонидан бугунги кунга қадар жами 15505 та қарор ва фармойишлар қабул қилинган. Шундан 7692 та ҳоким қарорлари, 3465 та ҳоким фармойиши ҳамда 4348 та Кенгаш қарорлари ҳисобланади.
Изоҳ (0)