АҚШнинг сайланган президенти Дональд Трамп ва унинг жамоаси республикачиларнинг инаугурациясидан сўнг дарҳол 100 дан ортиқ фармонларни имзолаш режаларини амалга ошириш орқали тизимни “ларзага солиш” ниятида, деб ёзмоқда CNN телеканали ўз манбаларига таяниб.
“Биз келганимизда қанчалик жиддий эканлигимизни кўрсатмоқчимиз. Трамп қайтди, ҳаракат қилиш вақти етиб келди. Бу тизим учун чинакам зарба бўлади”, деди Трампнинг маслаҳатчиларидан бири.
Оқ уйнинг сайланган раҳбари маслаҳатчиларидан яна бири кутилаётган ҳаракатларни “тез суръатли ва жуда шиддатли” деб таърифлади. Қайд этилишича, бир вақтнинг ўзида ўнлаб фармонларнинг имзоланиши Трамп лавозимида бўлган биринчи ҳафтада амалга оширилади.
Канал манбаларига кўра, гап, жумладан, АҚШда энергия ишлаб чиқаришни кўпайтириш, чегаралар хавфсизлигини кучайтириш, айрим соҳаларда тартибга солишни юмшатиш ва TikTok фаолиятини сақлаб қолишга қаратилган ҳужжатлар ҳақида кетмоқда. Аввалроқ Трамп ўз тарафдорларига инаугурацияси вақтидан АҚШда тўрт йиллик таназзул даври якунланишини ваъда қилди. Бундан ташқари, республикачи TikTok’ни тақиқлаш тўғрисидаги қонун ижросини дарҳол тўхтатиш режаларини маълум қилди.
The Guardian газетаси ҳам Трампнинг президентлиги биринчи кунида 100 дан ортиқ ҳужжатни имзолаш ниятида эканлиги ҳақида хабар берган. Газета маълумотларига кўра, бу чоралар қаторига мигрантларни оммавий чиқариб юбориш дастури, чегарада фавқулодда ҳолат эълон қилиш ва Америка экспортига 25 фоизлик бож солиқ жорий этиш ҳам киритилган.
АҚШнинг 47-президенти сайлови 2024 йил 5 ноябрда ўтказилган эди. Умумхалқ овоз беришида Трамп 51 фоиз, демократлар номзоди Камала Ҳаррис эса 47,4 фоиз овоз тўплаган.
Изоҳ (0)