AQSHning saylangan prezidenti Donald Tramp va uning jamoasi respublikachilarning inauguratsiyasidan so‘ng darhol 100 dan ortiq farmonlarni imzolash rejalarini amalga oshirish orqali tizimni “larzaga solish” niyatida, deb yozmoqda CNN telekanali o‘z manbalariga tayanib.
“Biz kelganimizda qanchalik jiddiy ekanligimizni ko‘rsatmoqchimiz. Tramp qaytdi, harakat qilish vaqti yetib keldi. Bu tizim uchun chinakam zarba bo‘ladi”, dedi Trampning maslahatchilaridan biri.
Oq uyning saylangan rahbari maslahatchilaridan yana biri kutilayotgan harakatlarni “tez sur’atli va juda shiddatli” deb ta’rifladi. Qayd etilishicha, bir vaqtning o‘zida o‘nlab farmonlarning imzolanishi Tramp lavozimida bo‘lgan birinchi haftada amalga oshiriladi.
Kanal manbalariga ko‘ra, gap, jumladan, AQSHda energiya ishlab chiqarishni ko‘paytirish, chegaralar xavfsizligini kuchaytirish, ayrim sohalarda tartibga solishni yumshatish va TikTok faoliyatini saqlab qolishga qaratilgan hujjatlar haqida ketmoqda. Avvalroq Tramp o‘z tarafdorlariga inauguratsiyasi vaqtidan AQSHda to‘rt yillik tanazzul davri yakunlanishini va’da qildi. Bundan tashqari, respublikachi TikTok’ni taqiqlash to‘g‘risidagi qonun ijrosini darhol to‘xtatish rejalarini ma’lum qildi.
The Guardian gazetasi ham Trampning prezidentligi birinchi kunida 100 dan ortiq hujjatni imzolash niyatida ekanligi haqida xabar bergan. Gazeta ma’lumotlariga ko‘ra, bu choralar qatoriga migrantlarni ommaviy chiqarib yuborish dasturi, chegarada favqulodda holat e’lon qilish va Amerika eksportiga 25 foizlik boj soliq joriy etish ham kiritilgan.
AQSHning 47-prezidenti saylovi 2024-yil 5-noyabrda o‘tkazilgan edi. Umumxalq ovoz berishida Tramp 51 foiz, demokratlar nomzodi Kamala Harris esa 47,4 foiz ovoz to‘plagan.
Izoh (0)