Қашқадарё вилоятининг Деҳқонобод, Бухоро вилоятининг Шофиркон ва Фарғона вилоятининг Тошлоқ туманларида ишга киритиб қўйиш билан боғлиқ фирибгарлик ҳолатлари фош этилди. Бу ҳақда Бош прокуратураси ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Деҳқонобод туманида “Д.К.” АЖ қўриқчиси М.А. фуқаролар С.У. ва Ё.I.нинг ишончига кириб, уларни ушбу корхонага ишга киритиб қўйиши эвазига 2,5 минг долларни олган вақтида ушланган.
Шунингдек, Шофиркон туман тиббиёт бирлашмаси бўлим ҳисобчиси Ю.Ҳ. фуқаро С.З.нинг ишончига кириб, уни ушбу тиббиёт бирлашмасига ишга киритиб қўйиши эвазига 700 доллар олган вақтида ушланган.
Шунингдек, “Тошлоқтумангаз” газчиси М.М. ва бошқалар ўзаро тил бириктириб фуқаро А.С.ни ушбу газ таъминоти корхонасига ишга киритиб қўйиши эвазига муқаддам 1,7 млн сўм ва 500 долларни фирибгарлик йўли билан қўлга киритганликлари аниқланди.
Ушбу пуллар ҳисобидан 640 долларнинг қайтарилиши процессуал тартибда расмийлаштирилган.
Мазкур ҳолатлар юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ишга жойлаб қўйиш учун олинаётган поралар
Май ойида “Тошкент метрополитени” ДУК “Ҳаракат” хизмати ходими фуқаронинг ишончига кириб, 2 миллион сўм эвазига ишга жойлаб қўйишга келишган ва ундан 1 миллион сўм миқдорида пора олаётган вақтда қўлга тушганди.
Тошкентнинг Сергели туманидаги мактабда эса юқори лавозимга ишга ўтказиш эвазига 200 доллар олган ўқитувчи ушланганди.
Қорақалпоғистонда фуқарони Қорақалпоқ давлат университетига ишга киритиш эвазига 1,8 минг доллар олган шахслар ушлангани айтилганди.
Бундан ташқари, Қорақалпоғистон Республикаси, Тошкент ва Андижон вилоятларида ишга ҳамда ўқишга киритиб қўйиш билан боғлиқ фирибгарлик ҳолатлари фош этилганди. Жумладан, Нукусда тез тиббий ёрдам илмий марказига ишга киритиш эвазига 40 млн сўм олган шахс ушланган.
Изоҳ (0)