Ўзбекистонда сўнгги 10 йилда зилзилалар оқибатида 16 киши ҳалок бўлган
Ўзбекистонда сўнгги 10 йилда олти маротаба 6-8 балли зилзила содир бўлган ва улар натижасида етказилган иқтисодий зарар 84 миллиард сўмни ташкил этган. Бу ҳақда Фавқулодда вазиятлар, Қурилиш вазирликлари, Фанлар академияси Сейсмология институти ва бошқа масъул ташкилотлар вакиллари иштирокида ўтказилган матбуот анжуманида маълум қилинди.
Ўзбекистон геологик жойлашувига кўра, Ўрта Ер денгизи — Осиё сейсмик камарида жойлашган. Шу боисдан, республика ва унга чегарадош ҳудудларда тез-тез зилзилалар содир бўлиб туриши табиий ҳол саналади. Таъкидланишича, Ўзбекистон ҳудудларида 1900 йилдан шу кунга қадар 60 дан ортиқ кучли ва ҳалокатли (магнитудаси 5 дан юқори бўлган) зилзилалар содир бўлган.
Сўнгги 10 йил мобайнида республикада жами олти маротаба 6-8 балли зилзилалар содир бўлган, натижада қурбонлар сони 16 кишини, жабрланганлар сони 54 кишини, иқтисодий зарар эса 84 миллиард сўмни ташкил этган.
Булар:
- Кон зилзиласи — 2011 йил (8 балл),
- Туябўғиз зилзиласи — 2013 йил (7 балл),
- Маржонбулоқ зилзиласи — 2013 йил (8 балл),
- Китоб ва Бахмал зилзилалари — 2016—2017 йиллар (7 балл),
- Бойсун зилзиласи – 2022 йил (6 балл).
Шунингдек, Сейсмопрогностик мониторинг Республика маркази томонидан Ўзбекистон ва унга чегарадош ҳудудларда 2023 йил 1 январдан бугунги кунгача магнитудаси (М= 2,8-6,8) бўлган 250 дан ортиқ зилзила қайд этилган.
Куни кеча Ўзбекистонда яқин кунларда яна зилзила содир бўлиши ҳақида турли хабарлар тарқалганди. Фавқулодда вазиятлар вазирлиги ҳолатга муносабат билдириб, бугунги кунда дунёнинг ҳеч бир давлатида зилзила содир бўладиган сана ва ҳатто тахминий вақтни башорат қила оладиган технологиялар мавжуд эмаслигини, Ўзбекистон сейсмик фаол зонада жойлашгани сабабли баъзида ер силкинишлари содир бўлиши ва ҳар доим шундай бўлганини билдирганди.
