АҚШ Гренландия пойтахти Нуук шаҳрида консуллик очди. Бу ҳақда АҚШ давлат котиби Майкл Помпео маълум қилди.
Майкл Помпео бу ерда америкаликларнинг бўлиши Арктика минтақасининг гуллаб-яшнашига ҳисса қўшишига умид билдирди.
АҚШ консуллиги Гренландияда биринчи марта 1940 йилда Дания фашистлар томонидан босиб олинган пайтда очилган ва 1953 йилда ёпилган. Америка унинг фаолиятини қайта тикламоқчи эканлиги 2019 йил охирида маълум бўлган.
2019 йилнинг август ойида The Wall Street Journal газетаси Дональд Трамп ўз маслаҳатчилари билан Дания автоном ҳудуди бўлган дунёдаги энг катта орол — Гренландияни сотиб олиш ғоясини бир неча бор муҳокама қилганини хабар қилганди. Трамп Гренландия оролини АҚШнинг Арктикадаги ўрнини кучайтириш мақсадида сотиб олмоқчи эди. Дания қироллик оиласи Трампнинг Гренландияни сотиб олиш таклифини мақтов деб қабул қилган.
Трамп бу маълумотни тасдиқлаб, Twitter’даги саҳифасида ҳазиломуз расм жойлаб Гренландияда Тrump Tower осмонўпар биноларини қурмасликка ваъда берган.
The Washington Post’нинг ёзишича, Трамп администрацияси Данияга Гренландияга чексиз эгалик қилиш учун йилига 600 миллион доллар таклиф қилмоқчи бўлган.
Дания ва Гренландия вакиллари орол сотилмаслигини, унинг тақдирини фақат аҳолининг ўзи ҳал қилиши мумкинлигини билдирган. Трамп Гренландияни сотишни муҳокама қилишдан бош тортгани сабабли Дания бош вазири билан учрашувини бекор қилган.
Изоҳ (0)