АҚШнинг сайланган президенти Дональд Трампнинг Гренландияни сотиб олиш ҳақидаги таҳдидидан сўнг Дания гербини ўзгартирди. Бу ҳақда The Guardian хабар берди.
Даниядаги ҳукмрон Глюксбурглар сулоласининг қироллик гербини ўзгартириш қарорига Трамп баёнотлари сабаб бўлган бўлиши мумкин. Декабрь ойи охирида қирол Фредерик Х Норвегия ва Швеция билан иттифоққа ишора қилган ва 500 йилдан ортиқ вақт давомида гербда бўлган учта тожни олиб ташлашни буюрди.
Шу билан бирга, Гренландия ва Фарер ороллари герблари — оқ айиқ ва қўчқор — икки қисмга бўлиниб, иккинчи ва учинчи майдонларга кўчирилган, Дания ва Жанубий Ютландия рамзлари эса биринчи ва тўртинчи майдонларга ўтказилган.
The Guardian эслатишича, бу Гренландия ва унинг ташқи сиёсати ҳамда хавфсизлик сиёсатини назорат қилишда давом этаётган Дания билан муносабатлари кескинлашуви фонида қабул қилинган. Шунингдек, газета маълумотларига кўра, Трампнинг яқинда Гренландияга эгалик қилиш “мутлақ зарурлиги” ҳақидаги баёнотлари ҳам герб бўйича қарорга таъсир этган бўлиши мумкин.
Декабрь ойида Трамп “бутун дунёда миллий хавфсизлик ва эркинликни таъминлаш учун” АҚШ Гренландияни эгаллаб олиши “мутлақо зарурлигини” айтганди. Данияга тегишли Муте Эгеде ороли бош вазири бунга жавобан Гренландия “сотилмаслигини ва ҳеч қачон савдолашилмаслигини” таъкидлаган. Шу билан бирга, Эгеде оролнинг Даниядан мустақил бўлишига эришиш истаги ҳақида гапирган.
Гренландия майдони 2,166 миллион квадрат километр бўлган дунёдаги энг катта орол бўлиб, унинг деярли 80 фоизи муз билан қопланган. У Шимолий Американинг шимоли-шарқида жойлашган. Оролда 50 мингдан сал кўпроқ аҳоли яшайди, уларнинг аксарияти инуитлар (эскимослар).
Бу мустақил давлат эмас, балки Дания таркибидаги автоном ҳудуддир. Аҳоли пунктлари асосан жануби-ғарбий қирғоқ бўйлаб тўпланган. Гренландия пойтахти Нуук.
Изоҳ (0)