АҚШ президентлигидан истеъфога чиқаётган Жо Байден 15 январь куни миллатга хайрлашув нутқини сўзлайди.
Матбуот хабарида тафсилотлар келтирилмаган, бироқ хайрлашув нутқи лавозимни тарк этаётган АҚШ президентлари учун анъана ҳисобланади. Масалан, ноябрь ойидаги президентлик сайловларида Оқ уй раҳбари этиб сайланган Дональд Трамп ўзининг биринчи президентлигининг сўнгида хайрлашув нутқининг катта қисмини ўз маъмурияти сиёсатидаги ютуқлар деб ҳисоблаган нарсаларга бағишлаган эди.
Хусусан, Трамп “бирорта ҳам уруш бошламаганини” таъкидлаган, шу билан бирга Хитойга “илгари ҳеч қачон бўлмаганидек” қарши тургани ва “АҚШнинг бошқа давлатлар билан иттифоқларини тиклаган”ини айтди.
Жо Байден 10 январь куни АҚШ президенти сифатидаги сўнгги музокаралардан бирини Украина президенти Владимир Зеленский билан ўтказди. Зеленскийнинг сўзларига кўра, Байден яна бир бор “Украина мустақиллигини сақлаш ва ҳимоя қилиш бутун Европа ва демократик дунё учун ҳал қилувчи аҳамиятга эга”лигини таъкидлади. Унинг миллатга қилажак хайрлашув мурожаатида ҳам шу мавзуга тўхталиб ўтилишини кутиш мумкин.
Аввалроқ Жо Байден АҚШ етакчиси сифатида Европа Иттифоқига сўнги ташрифини бекор қилганди — унинг Италияга ташрифи 9-12 январга мўлжалланган. Бунга Калифорнияда давом этаётган кенг кўламли ёнғинлар сабаб бўлди. Байденнинг ўзи маҳаллий қутқарувчилар билан учрашувидан сўнг бу ёнғинларни минтақа тарихидаги энг даҳшатли воқеа деб атади.
Изоҳ (0)