Ўзбекистон президенти Шавкат Мирзиёев 18-19 май кунлари давлат ташрифи билан Хитой Халқ Республикасида бўлади.
Ташриф арафасида 17 май куни Сиан шаҳрида Ўзбекистон–Хитой бизнес-форуми бўлиб ўтди. Форум давомида 20 дан ортиқ келишув ва шартномалар имзоланди.
Сирдарё вилояти ҳокими Акмалжон Маҳмудалиев форум вилоят учун янги имкониятлар эшигини очганини айтди.
“Президентимиз апрель ойида Сирдарёга уюштирган ташрифларида бизга жуда кўплаб йўналишларни белгилаб бердилар. Ҳозир Сирдарё вилояти мисолида айтиб ўтадиган бўлсам, демак, 61 та корхонада 67 та лойиҳа амалга ошган. Бу ўртача 520 млн долларлик лойиҳа ҳисобланади. Мана бугун бизнес форумда янги-янги компаниялар билан музокаралар олиб бордик. Ҳозирги кунда биздаги истиқболдаги лойиҳаларимиз 15 та бўлиб, бунда 1 млрд 486 млн долларлик келишувлар амалга ошди.
Шу ой якунигача Сирдарёда автомобиль ишлаб чиқариш бошланади. Қатор компаниялар билан биргаликда агрологистика бўйича 500 млн долларлик келишувлар имзоланди. Бундан ташқари, истиқболда Сирдарёни инновацион ҳудудга айлантириш ҳамда Хитой—Ўзбекистон муносабатида Сирдарёнинг роли алоҳида бўлишини таъминлаш бўйича иш олиб борилмоқда”, — дейди ҳоким.
Унинг сўзларига кўра, ҳозирги кунда энегетика тизимидаги вазифалардан келиб чиқиб, Сирдарё вилоятида қўшимча равишда энергетика соҳаси бўйича янги лойиҳалар амалга оширилиши белгиланди.
“Бунда албатта газни иқтисод қилиш ҳисобига кўмирга ўтказиш бўйича Хитой технологиясини жорий этиш масаласида музокаралар кетмоқда. Албатта, бу нарса энергия таъминотимизни тежаш ва муқобил энергияни ривожлантириш учун жуда катта бир йўналиш бўлади.
Биз Хитой мисолида кўряпмизки, илмий ёндашув ҳисобига янги технологиялар жараёнга татбиқ этилган. Шундан келиб чиқиб, хитойлик ҳамкорларимиз билан янги технологияларни Ўзбекистонда, айнан Сирдарё вилоятида жорий этиш бўйича жуда катта режаларни қилиб олдик.
Тадбиркорликни ривожлантириш ҳисобига камбағалликни қисқартиришга эришишимиз мумкин. Хитой тажрибасидан келиб чиқсак, янги иш ўринларини яратиб, кичик ва ўрта бизнесга давлат томонидан эътибор бериш натижасида камбағалликни қисқартириш масаласида ижобий натижага эришган. Жуда кўп хитойлик ҳамкорлар Ўзбекистонга инвестиция киритишга қизиқиш билдиришяпти”, — дея қўшимча қилди Сирдарё вилояти ҳокими Акмалжон Маҳмудалиев.
Изоҳ (0)