Тошкент шаҳрининг Яшнобод тумани ҳокимлиги масъуллари, шахсан ҳоким Ўзбекистон Республикаси номидан чиқарилган суд қарори ижросини таъминламаяпти. Ноқонуний ишдан бўшатилган ходим эса ишсизликдан сарсон бўлмоқда. Бу ҳақда “Дарё”га исм-шарифи жамоатчиликка сир бўлиб қолишини сўраган мурожаатчи маълум қилди.
Мурожаатчининг айтишича, у 2024 йилнинг 2 май куни Яшнобод тумани ҳокимининг “Парвоз” маҳалласида фаолият юритувчи ёрдамчиси сифатида иш бошлаган бўлиб, ўзига номаълум сабабларга кўра, шу йилнинг 12 сентябрь куни ҳоким фармойишига асосан лавозимидан бўшатилган.
Мен билан тузилган меҳнат шартномаси туман ҳокимининг 2024 йил 12 сентябрдаги фармойишига кўра тугатилган. Бироқ ҳокимлик мени ишдан бўшатишда Меҳнат кодексининг 161-моддаси (Меҳнат шартномасини иш берувчининг ташаббусига кўра бекор қилиш) 2-қисми 4- ва 5-бандларини бир вақтда қўллаб, ноқонуний бўшатишни амалга оширган. 2024 йилнинг 22 ноябрь куни Фуқаролик ишлари бўйича Миробод туманлараро судининг мана шу масаладаги мажлисида судьяга буни асослаб бериб, ҳоким фармойишини қонунга хилоф деб топишни сўрадик, дейди мурожаатчи.
Суд ҳужжатида келтирилишича, ҳоким ёрдамчисининг ишдан олинишига туман ҳокимлигининг ички тартиб-қоидаларига амал қилмаслик, туман прокурори, ҳокимнинг биринчи ўринбосари, Камбағалликни қисқартириш ва бандлик бўлими бошлиғи, шунингдек, МФЙ раисининг ходим ҳақидаги билдиргилари асос қилиб келтирилган. Суд мазкур ҳужжатларни кўриб чиқар экан, ҳоким фармойишини бекор қилишни, ходимга мажбурий ишдан қолган кунлари учун ҳокимликка иш ҳақи тўлатишни лозим топган.
Суд туман ҳокимининг 2024 йил 12 сентябрдаги мени ишдан бўшатиш ҳақидаги фармойишини бекор қилиб, мени ишимга тиклаш, шунингдек, мажбурий прогул учун ҳокимликдан 17 миллион 640 минг сўм иш ҳақимни ундириш ҳақида қарор чиқарган. Аммо ҳокимлик ҳар икки талабни ҳам бажармаяпти, дейди мурожаатчи.
“Дарё” журналисти Фуқаролик ишлари бўйича Миробод туман судининг 2024 йил 22 ноябрдаги қарори ижроси таъминланмаётгани сабаби билан қизиқди.
Бош прокуратура ҳузуридаги Мажбурий ижро бюросининг ахборот хизмати раҳбари Фаррух Тошпўлатовнинг маълумот беришича, ҳокимликнинг ходимлар билан ишловчи масъули мурожаатчини ишга тикламаган тақдирда жавобгарликка тортилиши ҳақида расман огоҳлантирилган.
Ходимни ишга тиклаш бўйича ҳокимликка қарор юборилган. Улар қарорни бажармаса, ҳокимлик масъулларига нисбатан маъмурий чора кўрилади. МИБнинг Яшнобод туман бўлими бошлиғи шахсан бу бўйича шуғулланяпти, дейди таҳририятга бу ҳақда ахборот берган Фаррух Тошпўлатов.
Таҳририят журналисти билан суҳбатлашган Яшнобод тумани ҳокимлиги масъули, ҳокимликнинг таҳлилий-назорат бўлими бошлиғи Шаҳзод Исроилов МИБдан уларга огоҳлантириш хати келганини тасдиқлади.
Икки кун илгари МИБдан шу ҳақда қарор келган. Ҳозирча ижроси таъминланмаган. Боиси туман ҳокими вақтинча меҳнатга лаёқатсизлик варақасига кўра шифохонада соғлиғини тиклаётгани учун ишга чиқмаяпти. Ҳоким ишга қайтгач, бу ҳақда қарор чиқарилади ва мурожаатчи ишига тикланади, дейди Шаҳзод Исроилов.
“Дарё” воқеалар ривожини кузатишда давом этади.
Изоҳ (0)