Сирдарё вилояти ҳокими вазифасини бажарувчи Акмалжон Маҳмудалиев дарсга бориш учун дарёдан қайиқда сузиб ўтаётган ўқувчи қиз таҳсил олувчи мактабга борди. Ва унинг онаси билан суҳбатлашди. Бу ҳақда вилоят ҳокимлиги ахборот хизмати хабар берди.
Маълум бўлишича, илмга интилган ўқувчи қиз рағбатлантирилган.
Ижтимоий тармоқларда кўплаб муҳокамаларга сабаб бўлган дарёдан қайиқда сузиб ўтган ўқувчи қиз воқеасига вилоят ҳокими вазифасини бажарувчи Акмалжон Маҳмудалиев эътибор қаратди. Бугун вилоят раҳбари Гулистон тумани «Соҳилобод» маҳалласидаги 15-умумтаълим мактабига ташриф буюрди ва видеода акс этган ҳолат иштирокчиси, асли Тошкент вилояти, Бекобод тумани, «Янги ҳаёт» маҳалласида яшовчи Замира Тўйчиеванинг онаси билан самимий суҳбатда бўлди, — дейилади вилоят ҳокимлигининг бу ҳақдаги расмий ахборотида.
Қайд этилишича, ҳоким ўқувчи қизнинг яхши таълим олиши учун ёрдамга тайёрлигини билдирган.
Аввало, қизингизнинг жасоратини кўриб қойил қолдим. Илмга чанқоқлиги шундоққина кўриниб турипди. Чуқур таълим олиши учун қўлимиздан келган барча ёрдамни кўрсатамиз, — деган вилоят ҳокими қизнинг онаси билан суҳбатда.Шунингдек, ўқувчи қиз Замира Тўйчиевага ўқишда фойдаланиши учун ноутбук, китоблар жамланмаси ҳамда Янги йил совғалари берилган.
Изоҳ (1)
Shunday hokimlarimizga, alohida e'tibor ko'rsatayotganlarga rahmat, rag'batlantirganlariga ham respekt, zo'r. Qizchaga ham gap yo'q, qo'rqmay yolg'iz o'tyapti, qoyil qolish kerak. Lekin, bu juda xavfliku, oqim ko'rinib turibdi, qayiqni olib ketib qolyapti, sal kuchliroq oqim bo'lsachi, qizchani kuchi yetishi dargumon, agar qizcha yoki oilasi qisqa yo'lni ko'zlab shu ishni qilayotgan bo'lsa, bu juda xavfli. Shu yerda hokim buvamiz ko'prik qilib berolmasa ham qayiqda o'tkazib qo'yadigan tajribali yoshi katta bir odamni biriktirib qo'ysalar, maoshmi va.h tashkil qilib bersalar yaxshi ish bo'lardi, qizchani tanimayman lekin doimiy shunday qilayotganini o'ylab uxlolmay chiqsam kk endi, yosh bolalarni o'zlari qayiqni boshqarishiga yo'l qo'ymaslik kerak. Hokim buvamiz yoki boshqa mas'ullar yechim qilib bersinlar, natijani ko'raylik, tinch uxlaylik.